១. ឧបយសុត្តវណ្ណនា

៥៣. ឧបេតីតិ ឧបយោ. កថមុបេតិ? តណ្ហាមានាទិវសេនាតិ អាហ ‘‘តណ្ហាមានទិដ្ឋិវសេនា’’តិ. កថមិទំ លព្ភតីតិ? ‘‘អវិមុត្តោ’’តិ វចនតោ. តណ្ហាទិដ្ឋិវសេន ហិ ពទ្ធោ, កិំ ឧបេតីតិ អាហ ‘‘បញ្ចក្ខន្ធេ’’តិ តព្ពិនិមុត្តស្ស តថា ឧបេតស្ស អភាវតោ. កោ បនុបេតីតិ? តំសមង្គីបុគ្គលោ. តណ្ហាទិដ្ឋិវសេន ឧបគមស្ស វុត្តត្តា វិញ្ញាណន្តិ អកុសលកម្មវិញ្ញាណមេវាតិ វទន្តិ. ជវាបេត្វាតិ គហិតជវំ កត្វា. យថា បដិសន្ធិំ អាកឌ្ឍិតុំ សមត្ថំ, ឯវំ កត្វា. តេនាហ ‘‘បដិសន្ធី’’តិអាទិ. អគ្គហណេ ការណំ វុត្តមេវ ‘‘ឱកំ បហាយ អនិកេតសារី’’តិ គាថាយ វិស្សជ្ជនេ. កម្មនិមិត្តាទិវសេន បដិសន្ធិយា បច្ចយភូតំ អារម្មណំ បដិសន្ធិជនកស្ស កម្មស្ស វសេន វោច្ឆិជ្ជតិ. បតិដ្ឋា ន ហោតិ សរាគកាលេ វិយ អនុបដ្ឋានតោ. អប្បតិដ្ឋិតំ វិញ្ញាណំ វុត្តប្បការេន. អនភិសង្ខរិត្វាតិ អនុប្បាទេត្វា បច្ចយឃាតេន.

ឧបយសុត្តវណ្ណនា និដ្ឋិតា.