២. ពីជសុត្តវណ្ណនា

៥៤. ពីជជាតានីតិ ជាត-សទ្ទោ បទបូរណមត្តន្តិ អាហ ‘‘ពីជានី’’តិ. វចន្តិ សេតវចំ. អជ្ជុកន្តិ តច្ឆកំ. ផណិជ្ជកំ តុលសិ. អភិន្នានីតិ ឯកទេសេនបិ អខណ្ឌិតានិ. ពីជត្ថាយាតិ ពីជកិច្ចាយ. ន ឧបកប្បតីតិ បច្ចយោ ន ហោតីតិ ទស្សេតិ. ន បាបិតានីតិ បូតិតំ ន ឧបគតានិ. តណ្ឌុលសារស្ស អាទានតោ សារាទានិ. អារម្មណគ្គហណវសេន វិញ្ញាណំ តិដ្ឋតិ ឯត្ថាតិ វិញ្ញាណដ្ឋិតិយោ. អារម្មណវសេនាតិ អារម្មណភាវវសេន. សិនេហនដ្ឋេនាតិ តណ្ហាយនវសេន សិនិទ្ធតាបាទនេន, យតោ ‘‘នន្ទូបសេចន’’ន្តិ វុត្តំ. តថា ហិ វិរោបិតំ តំ កម្មវិញ្ញាណំ បដិសន្ធិអង្កុរុប្បាទនសមត្ថំ ហោតិ. សប្បច្ចយន្តិ អវិជ្ជាអយោនិសោនមនសិការាទិបច្ចយេហិ សប្បច្ចយំ. វិរុហតិ វិបាកសន្តានុប្បាទនសមត្ថោ ហុត្វា.

ពីជសុត្តវណ្ណនា និដ្ឋិតា.