៤. ឱក្ខាសុត្តវណ្ណនា

២២៦. មហាមុខឧក្ខលីនន្តិ មហាមុខានំ មហន្តកោឡុម្ពានំ សតំ. បណីតភោជនភរិតានន្តិ សប្បិមធុសក្ករាទីហិ ឧបនីតបណីតភោជនេហិ បរិបុណ្ណានំ. តស្សាតិ បាឋស្ស. គោទុហនមត្តន្តិ គោទោហនវេលាមត្តំ. តំ បន កិត្តកំ អធិប្បេតន្តិ អាហ ‘‘គាវិយា’’តិអាទិ. សព្ពសត្តេសុ ហិតផរណន្តិ អនោធិសោមេត្តាភាវនមាហ – មេត្តចិត្តំ អប្បនាប្បត្តំ ភាវេតុំ សក្កោតីតិ អធិប្បាយោ. តម្បិ តតោ យថាវុត្តទានតោ មហប្ផលតរន្តិ.

ឱក្ខាសុត្តវណ្ណនា និដ្ឋិតា.