៥. ឯកន្តទុក្ខសុត្តវណ្ណនា

១១៨. ឯកន្តេនេវ ទុក្ខាតិ អវីចិមហានិរយោ វិយ ឯកន្តតោ ទុក្ខា ឯវ សុខេន អវោមិស្សា. ទុក្ខេន អនុបតិតាតិ ទុក្ខេនេវ សព្ពសោ ឧបគតា. ទុក្ខេន ឱក្កន្តាតិ ពហិទ្ធា វិយ អន្តោបិ ទុក្ខេន អវក្កន្តា អនុបវិដ្ឋា. សុខវេទនាបច្ចយតាយ ឥមាសំ ធាតូនំ សុខតា វិយ ទុក្ខវេទនាបច្ចយតាបិ វេទិតព្ពា, សង្ខារទុក្ខតា បន សព្ពត្ថ ចរិតា ឯវ. សព្ពត្ថាតិ សព្ពាសុ ធាតូសុ, សព្ពដ្ឋានេសុ វា. បឋមំ សុខំ ទស្សេត្វាបិ បច្ឆា ទុក្ខស្ស កថិតត្តា ‘‘ទុក្ខលក្ខណំ កថិត’’ន្តិ វុត្តំ.

ឯកន្តទុក្ខសុត្តវណ្ណនា និដ្ឋិតា.