៦. សគាថាសុត្តវណ្ណនា

១០០. ‘‘ធាតុសោ សំសន្ទន្តី’’តិ ឥទំ អជ្ឈាសយតោ សរិក្ខតាទស្សនំ, ន កាយេន មិស្សីភាវទស្សនន្តិ អាហ ‘‘សមុទ្ទន្តរេ’’តិអាទិ. និរន្តរោតិ និព្ពិសេសោ. សំសគ្គាតិ បញ្ចវិធសំសគ្គហេតុ. សំសគ្គគហណេន ចេត្ថ សំសគ្គវត្ថុកា តណ្ហា គហិតា. តេនាហ ‘‘ទស្សន…បេ… ស្នេហេនា’’តិ.

វនតិ ភជតិ សជ្ជតិ តេនាតិ វនំ, វនថោតិ ច កិលេសោ វុច្ចតីតិ អាហ ‘‘វនថោ ជាតោតិ កិលេសវនំ ជាត’’ន្តិ. ឥតរេ សំសគ្គមូលកាតិ តមេវ បដិក្ខិបន្តោ អាហ ‘‘អទស្សនេនា’’តិ. សាធុជីវីតិ សាធុ សុដ្ឋុ ជីវី, តំជីវនសីលោ. តេនាហ ‘‘បរិសុទ្ធជីវិតំ ជីវមានោ’’តិ.

សគាថាសុត្តវណ្ណនា និដ្ឋិតា.