២. ផស្សនានត្តសុត្តវណ្ណនា

៨៦. ជាតិបសុតិអារម្មណាទិភេទេន នានាភាវោ ផស្សោ. ជាតិបច្ចយភេទេន ហិ បច្ចយុប្បន្នស្ស ភេទោ ហោតិយេវ. ធម្មបរិច្ឆេទវសេន ធាតុទេសនាយំ តិស្សោ មននមត្តា ធាតុយោវ មនោធាតុយោ. កិរិយាមយស្ស ចិត្តុប្បត្តិវិភាគេន បច្ចយុប្បន្នស្ស វសេន ធាតុទេសនាយំ មននដ្ឋេន ធាតុតាយ សាមញ្ញតោ មនោទ្វារាវជ្ជនំ ‘‘មនោធាតូ’’តិ អធិប្បេតន្តិ វុត្តំ ‘‘មនោសម្ផស្សោ មនោទ្វារេ បឋមជវនសម្បយុត្តោ’’តិអាទិ. តស្មាតិ យស្មា កាមំ សម្បដិច្ឆនមនោធាតុអនន្តរំ ឧប្បជ្ជមានោ សន្តីរណវិញ្ញាណធាតុយា សម្បយុត្តោ ផស្សោបិ មនោសម្ផស្សោ ឯវ នាម, ទុព្ពលត្តា បន សោ សព្ពភវេសុ អសម្ភវតោ ច គហិតោ អនវសេសតោ គហណំ ន ហោតីតិ មនោទ្វារេ ជវនសម្ផស្សោ ហោតិ, តស្មា. អយមេត្ថ អត្ថោតិ អយំ ឥធ អធិប្បាយានុគតោ អត្ថោ.

ផស្សនានត្តសុត្តវណ្ណនា និដ្ឋិតា.