១០. ពន្ធនសុត្តវណ្ណនា

១២១. ឥទន្តិ ‘‘ឥធ, ភន្តេ’’តិអាទិកំ វចនំ. តេ ភិក្ខូ អារោចេសុន្តិ សម្ពន្ធោ. តេសូតិ តេសុ រញ្ញា ពន្ធាបិតមនុស្សេសុ. សុកតការណន្តិ សុការណកិរិយំ អារោចេសុំ, ន កេវលំ តេសំ មនុស្សានំ ពន្ធាបិតភាវំ. ឥទានិ តមត្ថំ វិត្ថារតោ ទស្សេតុំ ‘‘រញ្ញោ កិរា’’តិអាទិ វុត្តំ. អដ្ឋវង្កោតិ អដ្ឋំសោ. អន្តោឃរចារិនោតិ អន្តេបុរវាសិនោ.

ឧក្កដ្ឋេតិ យុទ្ធេ. មន្តីសូតិ គុត្តមន្តីសុ. អកុតូហលន្តិ សញ្ញតំ. បិយន្តិ បិយាយិតព្ពំ. អន្នបានម្ហិ មធុរេ អភុត្តេ ឧប្បន្នេ. អត្ថេតិ អត្ថេ កិច្ចេ ជាតេ ថិរន្តិ ន កថេន្តិ កាយពលមត្តេន អបនេតុំ សក្កុណេយ្យត្តា. សុដ្ឋុ រត្តរត្តាតិ អតិវិយ រត្តា ឯវ ហុត្វា រត្តា. សារត្តេនាតិ សារភាវេន សារភាវសញ្ញាយ. ឱហារិនន្តិ ហេដ្ឋា ហរណសីលន្តិ អាហ ‘‘ចតូសុ អបាយេសុ អាកឌ្ឍនក’’ន្តិ. សិថិលន្តិ សិថិលាការំ, ន បន សិថិលំ. តេនាហ ភគវា ‘‘ទុប្បមុញ្ច’’ន្តិ.

ពន្ធនសុត្តវណ្ណនា និដ្ឋិតា.

បឋមវគ្គវណ្ណនា និដ្ឋិតា.