១០. អនាថបិណ្ឌិកសុត្តវណ្ណនា

១០១. ទសមេ កាមំ ទេវតាសំយុត្តេបិ ‘‘ឥទំ ហិ តំ ជេតវន’’ន្តិអាទិនា ឥមា ឯវ គាថា អាគតា. តត្ថ ‘‘អញ្ញតរា ទេវតា’’តិ និទានំ អារោបិតំ. ហេដ្ឋា អាគតនយត្តា ឯវ ហិ បោត្ថកេសុ ន លិខិតំ, ឥធ បន ទេវបុត្តសំយុត្តេ ‘‘អនាថបិណ្ឌិកោ ទេវបុត្តោ’’តិ និទានេ និគមេ ច អាគតំ, តត្ថ ទេវបុត្តេន សត្ថុ វុត្តប្បការគុណបវេទនវសេន វុត្តំ. សត្ថា បន ភិក្ខូនំ តមត្ថំ បវេទេន្តោ ‘‘អញ្ញតរោ ទេវបុត្តោ’’តិ អាហ. តថា បវេទនេ បន ការណំ ទស្សេន្តោ ‘‘អានន្ទត្ថេរស្សា’’តិអាទិមាហ. អនុមានពុទ្ធិយាតិ អនុមានញាណស្ស. អានុភាវប្បកាសនត្ថន្តិ ពលទីបនត្ថំ.

អនាថបិណ្ឌិកសុត្តវណ្ណនា និដ្ឋិតា.

ទុតិយវគ្គវណ្ណនា និដ្ឋិតា.