៩. បាថេយ្យសុត្តវណ្ណនា

៧៩. សទ្ធា ពន្ធតិ បាថេយ្យន្តិ សទ្ធា នាម សត្តស្ស មរណវសេន មហាបថំ សំវជតោ មហាកន្តារំ បដិបជ្ជតោ មហាវិទុគ្គំ បក្ខន្ទតោ បាថេយ្យបុដំ ពន្ធតិ សម្ពលំ សជ្ជេតិ. កថន្តិ អាហ ‘‘សទ្ធំ ឧប្បាទេត្វា’’តិអាទិ. ឯតំ វុត្តន្តិ ‘‘សទ្ធា ពន្ធតិ បាថេយ្យ’’ន្តិ ឯតំ គាថាបទំ វុត្តំ ភគវតា. សិរីតិ កតបុញ្ញេហិ សេវីយតិ តេហិ បដិលភីយតីតិ សិរី. ឥស្សរិយំ វិភវោ. អាសយិតព្ពតោ អាសយោ, វសនដ្ឋានំ និកេតន្តិ អត្ថោ. បរិកឌ្ឍតីតិ ឥច្ឆាវសិកំ បុគ្គលំ តត្ថ តត្ថ ឧបកឌ្ឍតិ.

បាថេយ្យសុត្តវណ្ណនា និដ្ឋិតា.