៥. អនោមសុត្តវណ្ណនា

៤៥. អនោមនាមន្តិ អនូននាមំ. គុណនេមិត្តិកានិ ឯវ ហិ ភគវតោ នាមានិ. គុណានញ្ចស្ស បរិបុណ្ណតាយ អនូននាមន្តិ អាហ ‘‘សព្ពគុណសមន្នាគតត្តា’’តិអាទិ. អបិច តថា តេវិជ្ជោ, ឆឡភិញ្ញោតិអាទីនិ នាមានិ អនោមនាមានិ ន ហោន្តិ បរិច្ឆិន្នវិសយត្តា, ភគវតោ បន សត្ថា, សព្ពញ្ញូ, សម្មាសម្ពុទ្ធោតិអាទីនិ នាមានិ អនោមនាមានិ នាម មហាវិសយត្តា អនូនភាវតោ. តេនាហ ‘‘អវេកល្លនាម’’ន្តិ. ខន្ធន្តរាទយោតិ ខន្ធវិសេសាទិកេ. ញាណេន យាថាវតោ អរណីយដ្ឋេន អត្ថេ. អន្វយបញ្ញាធិគមាយាតិ លោកុត្តរបញ្ញាបដិលាភាយ. បដិបទន្តិ សមថវិបស្សនាបដិបទំ. កិលេសកាមានំ វសេន អល្លីយិតព្ពដ្ឋេន កាមា ឯវ អាលយោ. អតីតកាលេយេវ កមនតំ គហេត្វា វុត្តំ ‘‘កមមាន’’ន្តិ. ន ឯតរហិ តទភាវតោតិ អាហ ‘‘អតីតំ បន ឧបាទាយ ឥទំ វុត្ត’’ន្តិ. មហានុភាវតាទិនា មហន្តានំ.

អនោមសុត្តវណ្ណនា និដ្ឋិតា.