មហាសង្គាមំ

វោហរន្តេន ជានិតព្ពាទិវណ្ណនា

៣៦៨-៧៤. មហាសង្គាមេ ឯតេនេវ នយេន វេទិតព្ពន្តិ សម្ពន្ធោ. វត្ថុសង្កមនាការំ ទស្សេត្វា អវជាននបដិជាននាការំ ទស្សេន្តោ អាហ ‘‘យោ បនា’’តិអាទិ. យោ បន វទតីតិ សម្ពន្ធោ. ឯសេវាតិ ឯសោ ឯវ, អវជាននបដិជាននភិក្ខូតិ អត្ថោ.

៣៧៥. នីលាទិវណ្ណាវណ្ណវសេនាតិ នីលាទិវណ្ណវសេន ច អារោគ្យត្ថាទិអវណ្ណវសេន ច. សញ្ចរិត្តំ យស្មា អនេន សិក្ខាបទេន ធនំ អនុបទីយតិ, តស្មា ធនមនុប្បទានន្តិ វុច្ចតិ. បុព្ពបយោគោតិ បុព្ពេ បយុជ្ជិតព្ពោ.

អគតិអគន្តព្ពវណ្ណនា

៣៧៩. ពហុជនអហិតាយ បដិបន្នោ ហោតីតិ បាឡិំ វិត្ថារេន្តោ អាហ ‘‘វិនយធរេន ហី’’តិអាទិ. តត្ថ វិនយធរេនាតិ អនុវិជ្ជកេន, វិនិច្ឆិតេតិ សម្ពន្ធោ. ឱវាទូបជីវិនិយោតិ ភិក្ខូនំ ឱវាទំ ឧបនិស្សាយ ជីវិនិយោ. ឧបាសកាបីតិ រតនត្តយំ បដិស្សរណន្តិ ឧបាសកាបិ. ទាយកាបីតិ ភិក្ខូនំ បច្ចយទាយកាបិ. តេសន្តិ ឧបាសកាទីនំ. តថេវាតិ យថា ឧបាសកាទយោ ទ្វិធា ភិជ្ជន្តិ, តថេវ. តតោតិ អារក្ខទេវតាហិ បរន្តិ សម្ពន្ធោ. តេនាតិ ទ្វិធាការណេន.

៣៨២. គហននិស្សិតោតិ ឯត្ថ គហនសទ្ទោ ទិដ្ឋិបរិយាយោតិ អាហ ‘‘មិច្ឆាទិដ្ឋិអន្តគ្គាហិកទិដ្ឋិសង្ខាតំ គហន’’ន្តិ.

៣៩៣. តស្ស អវជានន្តោតិ ឯត្ថ ‘‘តស្សា’’តិ បទំ ‘‘វចន’’ន្តិ បាឋសេសេន សម្ពន្ធិតព្ពន្តិ អាហ ‘‘តស្ស វចន’’ន្តិ. តស្សាតិ នវកស្ស. តន្តិ នវកំ.

៣៩៤. ‘‘យំអត្ថាយា’’តិ ឯសោ សទ្ទោ សមាសោតិ អាហ ‘‘យទត្ថាយា’’តិ. ‘‘តំ អត្ថ’’ន្តិ ឯសោ សទ្ទោ លិង្គវិបល្លាសោតិ អាហ ‘‘សោ អត្ថោ’’តិ. អត្ថសទ្ទោ ហិ បុល្លិង្គោ, បាឡិយំ ន បរិហាបេតព្ពន្តិ ឯត្ថាបិ លិង្គវិបល្លាសោ វេទិតព្ពោ. សព្ពត្ថាតិ សព្ពស្មិំ មហាសង្គាមេ.

ឥតិ មហាសង្គាមវណ្ណនាយ យោជនា សមត្តា.