៦. បិណ្ឌចារិកវត្តកថា

៣៦៦. បិណ្ឌចារិកវត្តេ ឯវំ វិនិច្ឆយោ វេទិតព្ពោតិ យោជនា. កប្បាសំ វា គហេត្វាតិ សម្ពន្ធោ. យញ្ចាតិ យញ្ច កិញ្ចិ វត្ថុំ, គហេត្វាតិ សម្ពន្ធោ. ករោន្តី ឋិតា វាតិ ករោន្តី ហុត្វា ឋិតា វា. តន្តិ កម្មំ. ន ច ភិក្ខាទាយិកាយាតិ ឥត្ថិលិង្គវសេន វុត្តត្តា ឥត្ថិយា ឯវ មុខំ ន ឧល្លោកេតព្ពន្តិ អត្ថំ បដិក្ខិបន្តោ អាហ ‘‘ឥត្ថី វា ហោតូ’’តិអាទិ. ‘‘ភិក្ខាទានសមយេ’’តិ ឥមិនា អញ្ញស្មិំ សមយេ ឱលោកេន្តោបិ នត្ថិ ទោសោតិ ទស្សេតិ. ឯកស្មិំ កាលេ ភិក្ខាយ ទទមានាយ សព្ពកាលម្បិ ន ឱលោកេតព្ពន្តិ អនិច្ឆិតត្ថំ បដិក្ខិបតិ.