២០៨. សិវេយ្យកទុស្សយុគកថា

៣៣៥. សិវថិកន្តិ សិវា ជម្ពុកា កុណបខាទនត្ថាយ អាគន្ត្វា តិដ្ឋន្តិ ឯត្ថាតិ សិវដ្ឋំ, តទេវ សិវថិកំ, ឥមិនា សិវថិកាយំ ឧប្បន្នំ សិវេយ្យកំ ថិកសទ្ទស្ស លោបំ កត្វាតិ ទស្សេតិ. តត្ថាតិ ឧត្តរកុរូសុ. តន្តិ មតំ. ហត្ថិសោណ្ឌកសកុណាតិ ហត្ថិលិង្គវិហង្គមា. តេ ហិ ហត្ថិនោ សោណ្ឌោ វិយ សោណ្ឌោ ឯតេសុ អត្ថីតិ ហត្ថីសោណ្ឌកា, តេ ច តេ សកុណា ចេតិ ហត្ថិសោណ្ឌកសកុណាតិ វុច្ចន្តិ. រញ្ញោ អាហរន្តីតិ រញ្ញោ អត្ថាយ, សន្តិកំ វា អាហរន្តិ. ឥទន្តិ សិវេយ្យកំ ទុស្សយុគំ. សិវិរដ្ឋេ វាយិតំ សិវេយ្យកន្តិ ច ទស្សេន្តោ អាហ ‘‘អថវា’’តិអាទិ. តេនាតិ ការណេន. ‘‘សិវេយ្យកន្តិ…បេ… វទន្តី’’តិ បោរាណា អាហូតិ យោជនា.