១១០. បញ្ចន្នំ អប្បហិតេបិ អនុជាននកថា

១៩៣. បគេវ បហិតេតិ ឥមិនា ‘‘អបហិតេបិ គន្តព្ព’’ន្តិ ឯត្ថ បិសទ្ទស្ស សម្ភាវនត្ថំ ទស្សេតិ. បញ្ចន្នំ សហធម្មិកានំ សន្តិកំ គន្តព្ពភាវស្ស ការណំ វិភជិត្វា ទស្សេន្តោ អាហ ‘‘ភិក្ខុ គិលានោ ហោតី’’តិអាទិ. ទសហីតិ ‘‘សង្ឃោ កម្មំ កត្តុកាមោ ហោតិ, កតំ វា សង្ឃេន កម្មំ ហោតី’’តិ ឥទំ អង្គំ ឯកំ កត្វា ទសហិ. នវហីតិ បរិវាសារហំ អបនេត្វា នវហិ. ចតូហីតិ គិលានអនភិរតិកុក្កុច្ចទិដ្ឋិគតឧប្បន្នសង្ខាតេហិ ចតូហិ. ឥតិ ឥមេហិ ឆហីតិ យោជនា. សាមណេរស្សបិ ឆហីតិ ឯត្ថ ឆន្នំ សរូបំ វិត្ថារេត្វា ទស្សេន្តោ អាហ ‘‘អាទិតោ’’តិអាទិ. តំ សុវិញ្ញេយ្យមេវ. សាមណេរិយា សន្តិកំ បញ្ចហិ គន្តព្ពន្តិ យោជនា. បរតោតិ បរស្មា, បរស្មិំ វា. អន្ធកដ្ឋកថាយំ វុត្តន្តិ សម្ពន្ធោ. យេ ញាតកា វា យេ អញ្ញាតកា វា អត្ថិ, តេសម្បីតិ យោជនា. តន្តិ វចនំ.