១០. ទុតិយមារកថា

៣៥. មយ្ហន្តិបទស្ស ‘‘អនុប្បត្តា សច្ឆិកតា’’តិបទេសុ ឆដ្ឋីកត្តុភាវំ ទស្សេន្តោ អាហ ‘‘មយា ខោតិ អត្ថោ’’តិ. ‘‘អថ វា’’តិអាទិនា ‘‘មយ្ហ’’ន្តិបទស្ស ‘‘យោនិសោ មនសិការា, យោនិសោ សម្មប្បធានា’’តិបទេសុ សម្ពន្ធភាវំ ទស្សេតិ. ‘‘យោនិសោ មនសិការា, យោនិសោ សម្មប្បធានា’’តិ ឯត្ថ ការណត្ថេ និស្សក្កវចនន្តិ អាហ ‘‘តេន ហេតុនា’’តិ. ‘‘បុនា’’តិអាទិនា ‘‘មយ្ហ’’ន្តិបទំ ‘‘យោនិសោ មនសិការា, យោនិសោ សម្មប្បធានា’’តិបទេសុ សាម្យត្ថេ សាមិភាវេន យោជេត្វា បុន ‘‘អនុប្បត្តា, សច្ឆិកតា’’តិ បទេសុ កត្តុត្ថេ សាមិភាវេន វិភត្តិវិបល្លាសោ កាតព្ពោតិ ទស្សេតិ.