១១. ភទ្ទវគ្គិយកថា

៣៦. ភទ្ទំ រូបញ្ច ចិត្តញ្ច ឯតេសមត្ថីតិ ភទ្ទកា. វគ្គពន្ធនំ វគ្គោ ឧត្តរបទលោបេន, វគ្គេន ចរន្តីតិ វគ្គិយា. ភទ្ទកា ច តេ វគ្គិយា ចាតិ ភទ្ទវគ្គិយា កការលោបេនាតិ អត្ថំ ទស្សេន្តោ អាហ ‘‘ភទ្ទវគ្គិយា’’តិអាទិ. ‘‘វោការោ និបាតមត្តោ’’តិ ឥមិនា តុម្ហសទ្ទស្ស ច យោវចនស្ស ច ការិយភាវំ និវត្តេតិ. ហីតិ សច្ចំ. តេតិ ភទ្ទវគ្គិយា. ឥទន្តិ បញ្ចសីលរក្ខនំ. បុព្ពកម្មន្តិ បុព្ពេ ឧបចិតំ កុសលកម្មំ.