៥៨. អលជ្ជីនិស្សយវត្ថុកថា

១២០. ‘‘អលជ្ជីនំ ឱវាទ’’ន្តិ បាឋសេសេន យោជិតេ សាម្យត្ថេ សាមិវចនម្បិ យុជ្ជតេវ. តំ នយំ អទស្សេត្វា ‘‘ឧបយោគត្ថេ សាមិវចន’’ន្តិ វុត្តំ. ‘‘ភិក្ខូហិ សភាគត’’ន្តិ ឥមិនា ភិក្ខូហិ សមានោ សីលាទិគុណសង្ខាតោ ភាគោ ឥមស្សាតិ ភិក្ខុសភាគោ, តស្ស ភាវោ ភិក្ខុសភាគតន្តិ វចនត្ថំ ទស្សេតិ. ‘‘លជ្ជិភាវ’’ន្តិ ឥមិនា ភាវបច្ចយស្ស សរូបំ ទស្សេតិ. នវដ្ឋានន្តិ អភិនវដ្ឋានំ. គតេន ភិក្ខុនាតិ សម្ពន្ធោ.

ថេរោតិ និស្សយទាយកោ ថេរោ. គហេតុកាមោតិ និស្សយំ គហេតុកាមោ. អាចារន្តិ និស្សយបដិបន្នស្ស អាចារំ. តទហេវាតិ តស្មិំ គតអហនិ ឯវ. អាភោគស្ស កតត្តា, អរុណុគ្គមនស្ស ច អជាននត្តា វុត្តំ ‘‘អនាបត្តី’’តិ. អរុណុគ្គមនំ អជានន្តោបិ អាភោគស្ស អកតត្តា វុត្តំ ‘‘អរុណុគ្គមនេ ទុក្កដ’’ន្តិ. ‘‘ទ្វេ តីណិ ទិវសានី’’តិ បទេន ចតុ បញ្ច ឆ ទិវសានិបិ គហេតព្ពានិ លក្ខណហារនយេន អនិស្សិតេន វសិតព្ពភាវេន សមានផលត្តា. តេនាហ ‘‘សត្តាហំ វសិស្សាមី’’តិ. លទ្ធបរិហារោតិ លទ្ធោ បរិហារោ អាបត្តិអបនយនំ យេនាតិ លទ្ធបរិហារោ.