៥៦. អបត្តកាទិវត្ថុកថា

១១៨. យោ បិណ្ឌោ ហត្ថេសុ លព្ភតីតិ យោជនា. តទត្ថាយាតិ តស្ស បិណ្ឌស្ស អត្ថាយ. សេយ្យថាបិ តិត្ថិយាតិ ឯត្ថ សេយ្យថាបិសទ្ទោ ឧបមត្ថោ, តិត្ថិយសទ្ទោ អាជីវកនាមកេ តិត្ថិយេ ហោតីតិ ទស្សេន្តោ អាហ ‘‘យថាបិ អាជីវកនាមកា តិត្ថិយា’’តិ. តស្មា អាជីវកសង្ខាតេ តិត្ថិយេ ឧបមំ កត្វា ឧជ្ឈាយន្តីតិ អាហ ‘‘សូបព្យញ្ជនេហី’’តិអាទិ. ហីតិ សច្ចំ, យស្មា វា. តេតិ អាជីវកា. កម្មំ បន ន កុប្បតីតិ បត្តចីវរេសុ អសន្តេសុបិ កម្មវាចាយ ‘‘បរិបុណ្ណស្ស បត្តចីវរ’’ន្តិ បរិកិត្តិតត្តា កម្មំ ន កុប្បតីតិ អធិប្បាយោ.

យាចិតកេនាតិ ឯត្ថ យាចិតោ ហុត្វា គហិតោ យាចិតកោតិ ទស្សេន្តោ អាហ ‘‘យាចិត្វា គហិតេនា’’តិ. ‘‘ឦទិសេន ហី’’តិអាទិនា ទោសំ ទស្សេតិ. តស្មាតិ យស្មា អាបត្តិ ហោតិ, តស្មា. តស្សាតិ ឧបសម្បទាបេក្ខស្ស. និរបេក្ខេហិ អាចរិយុបជ្ឈាយាទីហីតិ យោជនា. និស្សជ្ជិត្វាតិ ព្រហ្មទេយ្យេន និស្សជ្ជិត្វា. អនធិដ្ឋានុបគានំ បត្តចីវរានំ អបត្តចីវរត្តា វុត្តំ ‘‘អធិដ្ឋានុបគំ បត្តចីវរ’’ន្តិ. បណ្ឌុបលាសន្តិ សមណុទ្ទេសភាវាបេក្ខំ. សោ ហិ រូឡ្ហិវសេន បណ្ឌុបលាសោតិ វុច្ចតិ. អថ វា យថា បណ្ឌុបលាសោ ន ហរិតោ, នាបិ សុក្ខោ ហោតិ, ឯវំ សោបិ បព្ពជាបេក្ខោ ន គិហី ហោតិ, នាបិ សាមណេរោ, តស្មា សមណុទ្ទេសភាវាបេក្ខោ ‘‘បណ្ឌុបលាសោ’’តិ វុច្ចតិ.

វសន្តស្ស បណ្ឌុបលាសស្សាតិ សម្ពន្ធោ. អនាមដ្ឋបិណ្ឌបាតន្តិ ភិក្ខូហិ អនាមសិតព្ពគ្គំ បិណ្ឌបាតំ. សាមណេរភាគសមកោតិ សាមណេរេហិ លទ្ធេន ភាគេន សមំ បវត្តោ. អស្សាតិ បណ្ឌុបលាសស្ស. សាមណេរស្ស សព្ពំ បដិជគ្គនកម្មំ កាតុំ វដ្ដតិ វិយ, អស្ស កាតុំ វដ្ដតីតិ យោជនា.