៥៥. អនុបជ្ឈាយកាទិវត្ថុកថា

១១៧. តេន ខោ បន សមយេនាតិ ឯត្ថ តសទ្ទស្ស អនិយមនិទ្ទេសភាវំ ទស្សេន្តោ អាហ ‘‘យេន សមយេនា’’តិ. សិក្ខាបទំ អបញ្ញត្តំ ហោតីតិ ‘‘ន ភិក្ខវេ អនុបជ្ឈាយកោ ឧបសម្បាទេតព្ពោ’’តិ សិក្ខាបទំ អបញ្ញត្តំ ហោតិ. ‘‘ឧបជ្ឈាយវិរហិត’’ន្តិ ឥមិនា អនុបជ្ឈាយកន្តិ ឯត្ថ អការស្ស វិរហត្ថំ ទស្សេតិ. ឧបជ្ឈាយវិរហិតំ ឧបសម្បទាបេក្ខន្តិ សម្ពន្ធោ. ‘‘ឯវ’’ន្តិអាទិនា ទោសំ ទស្សេតិ. ឧបជ្ឈំ អគាហាបេត្វាតិ ‘‘ឧបជ្ឈាយោ មេ ភន្តេ ហោហី’’តិ (មហាវ. ៦៥; មហាវ. អដ្ឋ. ៦៤) ឧបជ្ឈំ អគាហាបេត្វា. ឧបសម្បាទេន្តស្ស ការកសង្ឃស្សាតិ យោជនា. កម្មំ បនាតិ ឧបសម្បទកម្មំ បន. ‘‘ឯសេវ នយោ’’តិ ឥមិនា ឧបសម្បាទេន្តស្ស អាបត្តិ, កម្មំ បន ន កុប្បតីតិ វចនំ អតិទិសតិ.