៤៨. ថេយ្យសំវាសកវត្ថុកថា

១១០. បារិជញ្ញបត្តស្សាតិ បរិហាយតីតិ បរិជានិ, ឥស្សរិយភោគាទិ, តស្ស ភាវោ បារិជញ្ញំ, ឥស្សរិយភោគាទិក្ខយោ, តំ បត្តោតិ បារិជញ្ញបត្តោ, តស្ស. ‘‘បារិជុញ្ញបត្តស្សា’’តិបិ ឧការេន សហ បាឋោ អត្ថិ. ខីណកោលញ្ញោតិ ឯត្ថ កុលេ ជាតា កោលញ្ញា, ណ្យបច្ចយោ, នការាគមោ. ខីណា កោលញ្ញា អស្សាតិ ខីណកោលញ្ញោតិ វចនត្ថំ ទស្សេន្តោ អាហ ‘‘មាតិបក្ខបិតិបក្ខតោ’’តិអាទិ. តត្ថ មាតិបក្ខបិតិបក្ខតោតិ មាតុយា បក្ខោ មាតិបក្ខោ, បិតុនោ បក្ខោ បិតិបក្ខោ, មាតិបក្ខោ ច បិតិបក្ខោ ច មាតិបក្ខបិតិបក្ខា. ផាតិំ កាតុន្តិ ឯត្ថ ផា-ធាតុ វឌ្ឍនត្ថោតិ អាហ ‘‘វឌ្ឍេតុ’’ន្តិ. ‘‘បុច្ឆិយមានោ’’តិ ឥមិនា អនុយុញ្ជិយមានោតិ ឯត្ថ អនុត្យូបសគ្គវសេន យុជសទ្ទោ បុច្ឆនត្ថោតិ ទស្សេតិ.

ថេយ្យសំវាសកោតិ ថេននំ ថេយ្យំ នការស្ស យការំ កត្វា, ថេយ្យាយ សំវាសកោ ឥមស្សាតិ ថេយ្យសំវាសកោ. ឯត្ថ ច ន កេវលំ វស្សគណនាទិកោយេវ សំវាសោ នាម ហោតិ, អថ ខោ ថេយ្យាយ លិង្គគហណម្បិ សំវាសោយេវ នាម. តស្មា តស្ស តិវិធភាវំ ទស្សេន្តោ អាហ ‘‘តយោ’’តិអាទិ. តត្ថ លិង្គំ ថេនេតីតិ លិង្គថេនកោ, ឯសេវ នយោ ឥតរេសុបិ. តមត្ថំ វិត្ថារេន្តោ អាហ ‘‘តត្ថា’’តិអាទិ. តត្ថ យោតិ ថេយ្យសំវាសកោ. លិង្គមត្តស្សេវាតិ ឯត្ថ មត្តសទ្ទេន សំវាសាទយោ និវត្តេតិ.

វិទេសន្តិ អត្តនោ ទេសតោ វិយោគំ ទេសំ. វិសទ្ទោ ហេត្ថ វិយោគត្ថវាចកោ. អថ វា វិ ទូរំ ទេសំ. វិសទ្ទោ ហេត្ថ ទូរត្ថវាចកោ. មុសាតិ អភូតត្ថេ ទុតិយន្តនិបាតោ, អភូតំ វចនន្តិ អត្ថោ. បដិពាហតីតិ អញ្ញេ និវារេតិ. សំវាសថេនកោ នាមាតិ ឯត្ថ កោ សំវាសោ នាម, ននុ ឯកកម្មាទិកោតិ អាហ ‘‘ភិក្ខុវស្សគណនាទិកោ’’តិអាទិ. ភិក្ខុវស្សគណនាទិកោតិ អាទិសទ្ទេន យថាវុឌ្ឍំ វន្ទនសាទិយនំ អាសនបដិពាហនំ ឧបោសថបវារណាទីសុ សន្ទិស្សនន្តិ ឥមានិ សង្គណ្ហាតិ. ‘‘កិរិយភេទោ’’តិ ឥមិនា សំ ឯកតោ វសិយតិ អនេនាតិ សំវាសោតិ វចនត្ថេន កិរិយភេទោ សំវាសោ នាមាតិ ទស្សេតិ. ឥមស្មិំ អត្ថេតិ ឥមស្មិំ វត្ថុម្ហិ, ឥមស្មិំ ឋានេតិ អត្ថោ. ឥមិនា បារាជិកាទិដ្ឋានេ បន ឯកកម្មាទិកោ សំវាសោ នាមាតិ ទស្សេតិ.

‘‘លិង្គស្ស ចេវ សំវាសស្ស ចា’’តិ ឥមិនា ឧភយថេនកោតិ ឯត្ថ ឧភយសរូបំ ទស្សេតិ.

ឯត្ថាតិ ថេយ្យសំវាសកដ្ឋានេ. រាជ…បេ… ភយេហិ វាតិ ឯត្ថ ភយសទ្ទោ បច្ចេកំ យោជេតព្ពោ. រាជភយេន ច ទុព្ភិក្ខភយេន ច កន្តារភយេន ច រោគភយេន ច វេរិភយេន ចាតិ ហិ អត្ថោ. ចីវរគហណត្ថន្តិ ចីវរាហរណត្ថំ, អយមេវ វា បាឋោ. វាសទ្ទោ ហេត្វត្ថំ វា សម្បទានត្ថំ វា សម្បិណ្ឌេតិ. អយំ គាថា វិភត្តិយា ឧប្បដិបាដិត្តា ភគ្គរីតិសង្ខាតា អលង្ការទោសា ន មុត្តា. លិង្គន្តិ សមណលិង្គំ. ឥធាតិ ឥមស្មិំ សាសនេ.

នាធិវាសេតីតិ ន សម្បដិច្ឆតិ. យាវាតិ យត្តកំ កាលំ, អយំ បនេត្ថ យោជនា – ឥធ យោ រាជ…បេ… ភយេន វា ចីវរគហណត្ថំ វា លិង្គំ អាទិយតិ, សោ សុទ្ធមានសោ ហុត្វា យាវ សំវាសំ នាធិវាសេតិ, តាវ ឯសោ ‘‘ថេយ្យសំវាសកោ នាមា’’តិ ន វុច្ចតីតិ.

តត្រាតិ តាសុ គាថាសុ. ឥធាតិ ឥមស្មិំ សាសនេ. ឯវន្តិ លិង្គេ គហិយមានេ. តស្មិន្តិ ជនេ. អនោសរិត្វាវាតិ អនោក្កមិត្វាវ. លិង្គំ អបនេត្វាតិ សយំ គហិតំ សមណលិង្គំ វិនាសេត្វា. បព្ពជិតាលយន្តិ បព្ពជិតឆាយំ. បុព្ពេតិ សំវាសថេនកេ.

សព្ពបាសណ្ឌិយភត្តានីតិ សព្ពានិ បាសណ្ឌំ ឧទ្ទិស្ស ទិន្នានិ ភត្តានិ.

សត្តេ វហតីតិ សត្តវាហោ. វិរមិតព្ពន្តិ វេរំ, តំ បវត្តេតីតិ វេរិកោ. កាយេន បរិហរិតព្ពានីតិ កាយបរិហារិយានិ. តន្តិ តុវំ. ហីនាយាវត្តភាវន្តិ ហីនាយ គិហិភាវាយ អាវត្តភាវំ.

ឧប្បព្ពជិត្វាតិ បព្ពជវិយោគំ កត្វា. តមត្ថន្តិ ឧប្បព្ពជិតសង្ខាតមត្ថំ. អស្សាតិ មហាសាមណេរស្ស.

មហន្តោ វាតិ ឯត្ថ វាសទ្ទោ គរហត្ថោ. បគេវ ទហរោតិ ទស្សេតិ. អព្យត្តោ ហោតីតិ យោជនា. សោតិ សាមណេរោ.

វច្ឆគោរក្ខាទីនីតិ ឯត្ថ វច្ឆោតិ តរុណគោណោ. សោ ហិ មាតុសន្តិកេ វសតីតិ វច្ឆោ. មាតុយា វិយោគកាលេ វា វស្សតីតិ វច្ឆោតិ វុច្ចតិ. ឥមិនា ទម្មគវជរគ្គវាបិ សាមញ្ញតោ គហិតា. គោ វុច្ចតិ ខេត្តភូមិ. វច្ឆោ ច គោ ច វច្ឆគវា, តេសំ រក្ខនំ វច្ឆគោរក្ខោ, សោ អាទិ យេសំ កសិកម្មាទីនន្តិ វច្ឆគោរក្ខាទីនិ. ‘‘សូបសម្បន្នោ’’តិ ឥមិនា គហដ្ឋម្បិ សចេ ឧបសម្បាទេតិ, សូបសម្បន្នោតិ ទស្សេតិ. អនុបសម្បន្នកាលេយេវាតិ សាមណេរកាលេយេវ. វិនយវិនិច្ឆយេតិ វិនយេ វុត្តស្ស ថេយ្យសំវាសកស្ស វិនិច្ឆយេ. ថេយ្យសំវាសកោ ហោតិ លិង្គស្ស អបនីតត្តា.

ថេយ្យសំវាសកោ ន ហោតិ សលិង្គេ ឋិតត្តា. អយម្បិ ថេយ្យសំវាសកោ ន ហោតិ កាសាយេ សឧស្សាហត្តា. ថេយ្យសំវាសកោ ហោតិ កាសាយេ ធុរស្ស និក្ខិត្តត្តា.

ថេយ្យសំវាសកោ ន ហោតិ សលិង្គេ ឋិតត្តា. នេវ ថេយ្យសំវាសកោ ហោតិ កាសាយេ សឧស្សាហត្តា. មេថុនសេវនាទីហីតិអាទិសទ្ទេន បាណាតិបាតាទយោ សង្គណ្ហាតិ. ថេយ្យសំវាសកោ ហោតិ កាសាយេ ធុរស្ស និក្ខិត្តត្តា. ឱវដ្ដិកន្តិ អធោវដ្ដេន ករណំ. រក្ខតិ តាវាតិ តាវ រក្ខតិ វីមំសនេន និវាសិតត្តា. លិង្គន្តិ សមណលិង្គំ. ថេយ្យសំវាសកោ ហោតិ គិហិលិង្គស្ស សម្បដិច្ឆិតត្តា.

វីមំសតិ វា សម្បដិច្ឆតិ វា រក្ខតិយេវ ឱទាតវត្ថស្ស អន្តោកាសាយភាវតោ. ‘‘ភិក្ខុនិយាបិ ឯសេវ នយោ’’តិ វុត្តមេវត្ថំ វិភាវេន្តោ អាហ ‘‘សាបី’’តិអាទិ.

វុឌ្ឍបព្ពជិតោ សាមណេរោតិ សម្ពន្ធោ. បាឡិយម្បីតិ បន្តិយម្បិ. សេនោ មំសបេសិំ គហេត្វា គច្ឆតិ វិយ ភត្តបិណ្ឌេ បត្តំ ឧបនាមេត្វា គហេត្វា គច្ឆតិ. ថេយ្យសំវាសកោ ន ហោតិ វស្សានំ អគណនត្តា.