៤៨. តិត្ថិយបក្កន្តកកថា

១១០. បក្កមតីតិ បក្កន្តោ, ‘‘បវិដ្ឋោ’’តិ ឥមិនា កមុធាតុយា បទវិក្ខេបត្ថំ ទស្សេតិ, ឥច្ឆាកន្តិអត្ថេ និវត្តេតិ. សោតិ តិត្ថិយបក្កន្តកោ. តត្រាតិ តិត្ថិយបក្កន្តកេ. ឧបសម្បន្នោ ភិក្ខុ គច្ឆតីតិ សម្ពន្ធោ. តេសន្តិ តិត្ថិយានំ. ‘‘តិត្ថិយោ ភវិស្សាមី’’តិ បុព្ពេវ លទ្ធិគហិតត្តា វុត្តំ ‘‘លិង្គេ អាទិន្នមត្តេ’’តិ. កុសចីរាទីនីតិ ឯត្ថ កុសោ វុច្ចតិ សលាកា. ចីរោតិ បន្តិ, អាវលីតិ អត្ថោ. កុសេ រជ្ជុនា អាវុនិត្វា កតោ ចីរោ កុសចីរោ, សោ អាទិ យេសំ តានីតិ កុសចីរាទីនិ. អាទិសទ្ទេន ផលកចីរាទយោ សង្គណ្ហាតិ. កុសតិណេហិ កតោ ចីរោ កុសចីរោតិបិ វទន្តិ. នគ្គោតិ អចេលកោ. អាជីវកោតិ អចេលកវតមាទាយ ជីវតីតិ អាជីវកោ. តេសន្តិ អាជីវកានំ. ឱវទិតោ ហុត្វាតិ សម្ពន្ធោ.

កិន្តិ កិំ វតំ. លុញ្ចាបេតីតិ អបនយាបេតិ. មោរបិញ្ឆាទីនីតិ ឯត្ថ បិញ្ឆំ វុច្ចតិ បក្ខោ. សោ ហិ បិញ្ឆតិ អាកាសេ គច្ឆតិ អនេនាតិ បិញ្ឆន្តិ វុច្ចតិ. បិឆិ គតិយន្តិ ធាតុបាឋោ. មោរស្ស បិញ្ឆំ មោរបិញ្ឆំ, តំ អាទិ យេសំ តានីតិ មោរបិញ្ឆាទីនិ. អាទិសទ្ទេន ឧលូកបិញ្ឆាទយោ សង្គណ្ហាតិ. យាវ ន សម្បដិច្ឆតីតិ យាវ លទ្ធិំ ន សម្បដិច្ឆតិ. នន្តិ វីមំសមានំ ភិក្ខុំ. លទ្ធីតិ តិត្ថិយលទ្ធិ. រក្ខតីតិ តិត្ថិយបក្កន្តកតោ រក្ខតិ. លទ្ធិយា អភាវេន តិត្ថិយបក្កន្តកោ ន ហោតីតិ អធិប្បាយោ. អច្ឆិទ្ទចីវរោតិ ឯត្ថ អាការោ កោធត្ថោ, អឌ្ឌត្ថោ វា ហោតិ, ឆិទ្ទសទ្ទោ ទូសនត្ថោ ហោតិ. តស្មា អាកោធេន អឌ្ឌេន វា ឆិទ្ទោ ទូសិតោតិ អច្ឆិទ្ទោតិ អត្ថោ ទដ្ឋព្ពោ. ‘‘អច្ឆិន្នោ’’តិបិ បាឋោ. អច្ឆិទ្ទំ ចីវរមេតស្សាតិ អច្ឆិទ្ទចីវរោ. តិត្ថាយតនន្តិ តិត្ថីនំ និវាសដ្ឋានំ, តិត្ថិយានំ ឧបស្សយន្តិ អត្ថោ.