៣៣. ឥណាយិកវត្ថុកថា

៩៦. ឥណាយិកោ នាមាតិ ឯត្ថ ឥណន្តិ ឧទ្ធារោ. សោ ហិ យស្មា ឯតិ វុទ្ធិំ គច្ឆតិ, តស្មា ឥណន្តិ វុច្ចតិ. តំ គណ្ហាតិ, ធារេតីតិ វា ឥណាយិកោ. យំ វាតិ ជនំ វា អាឋបេត្វាតិ សម្ពន្ធោ. អាឋបេត្វាតិ ច បេសនត្ថាយ ធនសាមិកស្ស សន្តិកេ ឋបេត្វាតិ អត្ថោ. អាការោ ហិ បេសនត្ថវាចកោ. សោបីតិ បិសទ្ទោ បុរិមជនេ អបេក្ខតិ. ‘‘ធារេតី’’តិ ឥមិនា អាយិកបច្ចយោ ធារណត្ថេ ហោតីតិ ទស្សេតិ. អញ្ញេតិ មាតាបិតូហិ អញ្ញេ. ហីតិ សច្ចំ, យស្មា វា. តេតិ អញ្ញេ ញាតកា, តំ អាឋបេតុំ យស្មា ន ឥស្សរា, តស្មា ន ឥណាយិកោតិ យោជនា. ឥតរន្តិ នឥណាយិកតោ អញ្ញំ. អស្សាតិ ជនស្ស. នន្តិ តំ ជនំ. តេសូតិ ញាតិសាលោហិតាទីសុ. តថារូបស្សាតិ អត្តនោ ញាតិសាលោហិតស្សាតិ អត្ថោ. អារោចេតព្ពាការំ ទស្សេន្តោ អាហ ‘‘សហេតុកោ’’តិអាទិ. តត្ថ សហេតុកោតិ ភព្ពោ. សោតិ ឧបដ្ឋាកោ. បដិបជ្ជតីតិ បដិទទាតិ. ឯតន្តិ កប្បិយភណ្ឌំ. អជានិត្វាតិ ឥណាយិកភាវមជានិត្វា. បស្សន្តេនាតិ ឥណាយិកំ បស្សន្តេន. ‘‘អបស្សន្តស្ស គីវា ន ហោតី’’តិ ឥមិនា បស្សិត្វា អទស្សេន្តស្ស គីវា ហោតីតិ ទស្សេតិ.

បុច្ឆិយមានោបីតិ ‘‘កិំ ត្វំ ឥណាយិកោសី’’តិ បុច្ឆិយមានោបិ. តន្តិ ឥណាយិកំ. តត្ថាតិ អញ្ញស្មិំ ទេសេ. តន្តិ ឥណសាមិកំ. សោតិ ឥណសាមិកោ. អយន្តិ ឥណាយិកោ. អយន្តិ វចនា. តត្ថាតិ ឥណាយិកស្ស បព្ពាជនេ. សាមីចីតិ អនុធម្មតា.

នន្តិ ឥណាយិកំ. សោតិ ឥណសាមិកោ. អស្សាតិ ថេរស្ស. គីវា ន ហោតីតិ សម្ពន្ធោ. អច្ឆតូតិ អាសតុ ឧបវេសតូតិ អត្ថោ. សោតិ ឥណាយិកោ. ឦទិសោតិ សហេតុកោ វត្តសម្បន្នោតិ អត្ថោ. អតិអារាធកោតិ វត្តាចារេន ថេរស្ស អតិតោសកោ.