២៧. រាជភដវត្ថុកថា

៩០. ឧច្ចិនថាតិ ឯត្ថ ចិធាតុយា វឌ្ឍនត្ថំ ទស្សេន្តោ អាហ ‘‘វឌ្ឍេថា’’តិ. សោតាបន្នត្តាតិ ពិម្ពិសាររញ្ញោ =០៨ សោតាបន្នភាវតោ. ឃាតេថាតិ ជីវិតា វោរោបេថ. ហនថាតិ បហរថ. តតោតិ ឧបជ្ឈាយតោ. អាចរិយោ សេដ្ឋោតិ សម្ពន្ធោ. តតោតិ អាចរិយតោ. ឥទន្តិ វចនំ, អាគតន្តិ សម្ពន្ធោ. អាហំសុ វោហារិកា មហាមត្តា មុសាវាទេនាតិ យោជនា. អមច្ចោតិ សព្ពរាជកិច្ចេសុ អមា សហ រញ្ញា ភវតីតិ អមច្ចោ. អមាសទ្ទោ សហត្ថេ និបាតោ. ‘‘អមា’’តិ និបាតតោ ភវត្ថេ អច្ចបច្ចយោ (មោគ្គល្លានេ ៤.២៣ សុត្តេ). មហាមត្តោតិ មហន្តោ មត្តា ឥស្សរិយា ឯតស្សាតិ មហាមត្តោ. មត្តាសទ្ទោ ហេត្ថ ឥស្សរិយវាចកោ. សេវកោតិ រាជានំ សេវតិ ភជតីតិ សេវកោ. ភត្តវេតនភដោតិ ភត្តវេតនានមត្ថាយ ភដោ. តស្សាតិ រាជភដស្ស. បុត្តនត្តភាតុកាទយោតិអាទិសទ្ទេន ភាគិនេយ្យាទយោ សង្គណ្ហាតិ. យោ បនាតិ រាជភដោ បន. និយ្យាតេតីតិ អប្បេតិ. តំ ឋានន្តិ តំ រាជភដដ្ឋានំ. យេន វាតិ កម្មការេន វា. យំកម្មការណាតិ យស្ស កម្មស្ស ការណា. យោ វាតិ រាជភដោ វា. បព្ពជស្សូតិ បព្ពាជេហិ.