៩. នវមសិក្ខាបទំ

១០១៥. នវមេ សិប្បសទ្ទោ បច្ចេកំ យោជេតព្ពោ ‘‘ហត្ថិសិប្បញ្ច អស្សសិប្បញ្ច រថសិប្បញ្ច ធនុសិប្បញ្ច ថរុសិប្បញ្ចា’’តិ. តត្ថ ថរុសិប្បន្តិ អសិកីឡនសិប្បំ. មន្តសទ្ទោបិ បច្ចេកំ យោជេតព្ពោ ‘‘អាថព្ពណមន្តោ ច ខីលនមន្តោ ច វសីករណមន្តោ ច សោសាបនមន្តោ ចា’’តិ. តត្ថ អាថព្ពណមន្តោតិ អាថព្ពណវេទេន វិហិតោ បរូបឃាតករោ មន្តោ. ខីលនមន្តោតិ សារទារុខីលំ មន្តេន ជប្បិត្វា បថវិយំ និខណិត្វា ធារណមន្តោ. វសីករណមន្តោតិ មន្តេន ជប្បិត្វា បរស្ស ឧម្មត្តភាវមាបន្នករណោ មន្តោ. សោសាបនមន្តោតិ បរស្ស មំសលោហិតាទិសោសាបនមន្តោ. អគទបយោគោតិ ភុសវិសស្ស បយោជនំ. អាទិសទ្ទេន អញ្ញេបិ បរូបឃាតករណេ សិប្បេ សង្គណ្ហាតិ. យក្ខបរិត្តន្តិ យក្ខេហិ សមន្តតោ តាណំ. នាគមណ្ឌលន្តិ សប្បានំ បវេសននិវារណត្ថំ មណ្ឌលពន្ធមន្តោ. អាទិសទ្ទេន វិសបដិហននមន្តាទយោ សង្គណ្ហាតីតិ. នវមំ.