៣. តតិយសិក្ខាបទំ

៩៨៨. តតិយេ យត្តកន្តិ យត្តកំ សុត្តន្តិ សម្ពន្ធោ. អញ្ឆិតន្តិ កឌ្ឍិតំ. តស្មិន្តិ តត្តកេ សុត្តេតិ សម្ពន្ធោ. តក្កម្ហីតិ ឯត្ថ តក្កោតិ ឯកោ អយោមយោ សុត្តកន្តនស្ស ឧបករណវិសេសោ. សោ ហិ តកីយតិ សុត្តំ ពន្ធីយតិ ឯត្ថ, ឯតេនាតិ វា តក្កោតិ វុច្ចតិ, តស្មិំ. កន្តនតោតិ កន្តីយតេ កប្បាសាទិភាវស្ស ឆិន្ទីយតេ កន្តនំ, តតោ.

៩៨៩. ទសិកសុត្តាទិន្តិ ឯត្ថ ទសាតិ វត្ថស្សាវយវោ. សោ ហិ ទិយ្យតិ អវខណ្ឌីយតីតិ ទសាតិ វុច្ចតិ, តស្សំ ទសាយំ បវត្តំ ទសិកំ, តមេវ សុត្តំ ទសិកសុត្តំ. អាទិសទ្ទេន វក្ខមានំ ទុក្កន្តិតសុត្តាទិំ សង្គណ្ហាតីតិ. តតិយំ.