១. បឋមសិក្ខាបទ-អត្ថយោជនា

៩៧៨. ចិត្តាគារវគ្គស្ស បឋមេ រញ្ញោ កីឡនដ្ឋានំ អគារំ រាជាគារន្តិ វចនត្ថំ ទស្សេន្តោ អាហ ‘‘រញ្ញោ កីឡនឃរ’’ន្តិ. ចិត្តំ អគារំ ចិត្តាគារំ. អារាមន្តិ នគរតោ នាតិទូរអារាមោតិ អាហ ‘‘ឧបវន’’ន្តិ. ឧយ្យានន្តិ សម្បន្នបុប្ផផលតាយ ឧទ្ធំ ឧល្លោកេត្វា មនុស្សា យន្តិ គច្ឆន្តិ ឯត្ថាតិ ឧយ្យានំ. បោក្ខរណិន្តិ បោក្ខរំ បទុមំ នេតីតិ បោក្ខរណី. បញ្ចបីតិ រាជាគារាទីនិ បញ្ចបិ. សព្ពត្ថាតិ ទស្សនត្ថាយ គមនេ ច គន្ត្វា បស្សនេ ចាតិ សព្ពេសុ.

៩៨១. ‘‘អជ្ឈារាមេ’’តិអាទិនា អារាមេ ឋិតាយ អារាមតោ ពហិ កតេ រាជាគារាទិកេ បស្សន្តិយាបិ អនាបត្តីតិ ទស្សេតិ. តានីតិ រាជាគារាទីនីតិ. បឋមំ.