៩. នវមសិក្ខាបទំ

៨៧៥. នវមេ អភិសបេយ្យាតិ ឯត្ថ សបធាតុស្ស អក្កោសនត្ថំ អន្តោកត្វា ករធាតុយា អត្ថំ ទស្សេន្តោ អាហ ‘‘សបថំ ករេយ្យា’’តិ. និរយេ និព្ពត្តាម្ហីតិ អហំ និរយេ និព្ពត្តា អម្ហីតិ យោជនា. និរយេ និព្ពត្តតូតិ ឯសា ភិក្ខុនី និរយេ និព្ពត្តតូតិ យោជនា. ឦទិសា ហោតូតិ មម សទិសា ហោតូតិ អត្ថោ. កាណាតិ ឯកក្ខិកាណា, ទ្វក្ខិកាណា វា. កុណីតិ ហត្ថបាទាទិវង្កា.

៨៧៨. ឯទិសាតិ វិរូបាទិជាតិកា. វិរមស្សូតិ វិរមាហិ. អទ្ធាតិ ធុវន្តិ. នវមំ.