២. អន្ធការវគ្គោ

១. បឋមសិក្ខាបទ-អត្ថយោជនា

៨៣៩. អន្ធការវគ្គស្ស បឋមេ អប្បទីបេតិ ឧបលក្ខណវសេន វុត្តត្តា អញ្ញេបិ អាលោកា គហេតព្ពាតិ ទស្សេន្តោ អាហ ‘‘បទីបចន្ទសូរិយអគ្គីសូ’’តិអាទិ. អស្សាតិ ‘‘អប្បទីបេ’’តិបទស្ស.

៨៤១. នរហោអស្សាទាបេក្ខា ហុត្វា ច រស្សាទតោ អញ្ញវិហិតាវ ហុត្វា ចាតិ យោជនា. ឥមិនា ‘‘សន្តិដ្ឋតិ វា សល្លបតិ វា’’តិ បទេ កិរិយាវិសេសនភាវំ ទស្សេតិ. ទានេន វា និមិត្តភូតេន, បូជាយ វា និមិត្តភូតាយ មន្តេតីតិ យោជនាតិ. បឋមំ.

២. ទុតិយសិក្ខាបទំ

៨៤២. ទុតិយេ ឥទមេវ បទំ នានន្តិ សម្ពន្ធោតិ. ទុតិយំ.

៣. តតិយសិក្ខាបទំ

៨៤៦. តតិយេ ‘‘ឥទមេវា’’តិ បទំ អនុវត្តេតព្ពំ. តាទិសមេវាតិ បឋមសទិសមេវាតិ អត្ថោតិ. តតិយំ.

៤. ចតុត្ថសិក្ខាបទំ

៨៥០. ចតុត្ថេ កណ្ណស្ស សមីបំ និកណ្ណំ, តមេវ និកណ្ណិកន្តិ វុត្តេ កណ្ណមូលន្តិ អាហ ‘‘កណ្ណមូលំ វុច្ចតី’’តិ. ‘‘កណ្ណមូលេ’’តិ ឥមិនា ‘‘និកណ្ណិក’’ន្តិ ឯត្ថ ភុម្មត្ថេ ឧបយោគវចនន្តិ ទស្សេតិ. អាហរណត្ថាយាតិ អាហរាបនត្ថាយាតិ. ចតុត្ថំ.

៥. បញ្ចមសិក្ខាបទំ

៨៥៤. បញ្ចមេ តេសន្តិ ឃរសាមិកានំ. ឃរម្បីតិ ន កេវលំ អាសនមេវ, ឃរម្បិ សោធេមាតិ អត្ថោ. តតោតិ បរិវិតក្កនតោ, បរន្តិ សម្ពន្ធោ.

៨៥៨. ចោរា វា ឧដ្ឋិតា ហោន្តីតិ យោជនាតិ. បញ្ចមំ.

៦. ឆដ្ឋសិក្ខាបទំ

៨៦០. ឆដ្ឋេ អភិនិសីទេយ្យាតិ ឯត្ថ អភិសទ្ទោ ឧបសគ្គមត្តោវាតិ ទស្សេន្តោ អាហ ‘‘និសីទេយ្យា’’តិ. ឯសេវ នយោ អភិនិបជ្ជេយ្យាតិ ឯត្ថាបិ. ទ្វេ អាបត្តិយោតិ សម្ពន្ធោតិ. ឆដ្ឋំ.

៧. សត្តមសិក្ខាបទំ

៨៦៤. សត្តមេ សព្ពន្តិ សកលំ វត្តព្ពវចនន្តិ. សត្តមំ.

៨. អដ្ឋមសិក្ខាបទំ

៨៦៩. អដ្ឋមេ អនុត្តានវចនំ នត្ថីតិ. អដ្ឋមំ.

៩. នវមសិក្ខាបទំ

៨៧៥. នវមេ អភិសបេយ្យាតិ ឯត្ថ សបធាតុស្ស អក្កោសនត្ថំ អន្តោកត្វា ករធាតុយា អត្ថំ ទស្សេន្តោ អាហ ‘‘សបថំ ករេយ្យា’’តិ. និរយេ និព្ពត្តាម្ហីតិ អហំ និរយេ និព្ពត្តា អម្ហីតិ យោជនា. និរយេ និព្ពត្តតូតិ ឯសា ភិក្ខុនី និរយេ និព្ពត្តតូតិ យោជនា. ឦទិសា ហោតូតិ មម សទិសា ហោតូតិ អត្ថោ. កាណាតិ ឯកក្ខិកាណា, ទ្វក្ខិកាណា វា. កុណីតិ ហត្ថបាទាទិវង្កា.

៨៧៨. ឯទិសាតិ វិរូបាទិជាតិកា. វិរមស្សូតិ វិរមាហិ. អទ្ធាតិ ធុវន្តិ. នវមំ.

១០. ទសមសិក្ខាបទំ

៨៧៩. ទសមេ អនុត្តានដ្ឋានំ នត្ថីតិ. ទសមំ.

អន្ធការវគ្គោ ទុតិយោ.