៦. ឆដ្ឋសង្ឃាទិសេសសិក្ខាបទំ

៧០៥. ឆដ្ឋេ យតោ ត្វន្តិ ឯត្ថ ការណត្ថេ តោបច្ចយោតិ អាហ ‘‘យស្មា’’តិ. កស្សា ហោន្តីតិ ឧយ្យោជិកាឧយ្យោជិតាសុ កស្សា ភិក្ខុនិយា ហោន្តីតិ យោជនា. ន ទេតីតិ ឧយ្យោជិកា ឧយ្យោជិតាយ ន ទេតិ. ន បដិគ្គណ្ហាតីតិ ឧយ្យោជិតា ឧយ្យោជិកាយ ហត្ថតោ ន បដិគ្គណ្ហាតិ. បដិគ្គហោ តេន ន វិជ្ជតីតិ តេនេវ ការណេន ឧយ្យោជិកាយ ហត្ថតោ ឧយ្យោជិតាយ បដិគ្គហោ ន វិជ្ជតិ. អាបជ្ជតិ គរុកំ, ន លហុកន្តិ ឯវំ សន្តេបិ ឧយ្យោជិកា គរុកមេវ សង្ឃាទិសេសាបត្តិំ អាបជ្ជតិ, ន លហុកំ. តញ្ចាតិ តំ អាបជ្ជនញ្ច. បរិភោគបច្ចយាតិ ឧយ្យោជិកាយ បរិភោគសង្ខាតា ការណាតិ អយំ គាថាយត្ថោ.

ឥតរិស្សា បនាតិ ឧយ្យោជិតាយ បន ភិក្ខុនិយា. បឋមសិក្ខាបទេតិ បញ្ចមសិក្ខាបទេ. បញ្ចមសិក្ខាបទញ្ហិ ឥមិនា សិក្ខាបទេន យុគឡភាវេន សទិសត្តា ឥមំ ឧបាទាយ បឋមន្តិ វុត្តន្តិ. ឆដ្ឋំ.