៨. កុមារិភូតវគ្គោ

១-២-៣. បឋម-ទុតិយ-តតិយសិក្ខាបទ-អត្ថយោជនា

១១១៩. កុមារិភូតវគ្គស្ស បឋមទុតិយតតិយេសុ យា បន តា មហាសិក្ខមានាតិ សម្ពន្ធោ. សព្ពបឋមា ទ្វេ មហាសិក្ខមានាតិ គព្ភិនិវគ្គេ សព្ពាសំ សិក្ខមានានំ បឋមំ វុត្តា ទ្វេ មហាសិក្ខមានា. តា បនាតិ មហាសិក្ខមានា បន. សិក្ខមានាឥច្ចេវ វត្តព្ពាតិ សម្មុតិកម្មេសុ សាមញ្ញតោ វត្តព្ពា. ‘‘គិហិគតា’’តិ វា ‘‘កុមារិភូតា’’តិ វា ន វត្តព្ពា, វទន្តិ ចេ, សម្មុតិកម្មំ កុប្បតីតិ អធិប្បាយោ. គិហិគតាយាតិ ឯត្ថ គិហិគតា នាម បុរិសន្តរគតា វុច្ចតិ. សា ហិ យស្មា បុរិសសង្ខាតេន គិហិនា គមិយិត្ថ, អជ្ឈាចារវសេន, គិហិំ វា គមិត្ថ, តស្មា គិហិគតាតិ វុច្ចតិ. អយំ សិក្ខមានាតិ សម្ពន្ធោ. កុមារិភូតា នាម សាមណេរា វុច្ចតិ. សា ហិ យស្មា អគិហិគតត្តា កុមារី ហុត្វា ភូតា, កុមារិភាវំ វា ភូតា គតា, តស្មា កុមារិភូតាតិ វុច្ចតិ. តិស្សោបីតិ គិហិគតា កុមារិភូតា មហាសិក្ខមានាតិ តិស្សោបិ. សិក្ខមានាតិ សិក្ខំ មានេតីតិ សិក្ខមានាតិ. បឋម ទុតិយ តតិយានិ.

៤. ចតុត្ថសិក្ខាបទំ

១១៣៦. ចតុត្ថេ អនុត្តានវចនំ នត្ថីតិ. ចតុត្ថំ.

៥. បញ្ចមសិក្ខាបទំ

បញ្ចមេ ឯត្ថ សិក្ខាបទេ ‘‘សង្ឃេន បរិច្ឆិន្ទិតព្ពា’’តិ យំ វចនំ វុត្តំ, តស្សាតិ យោជនាតិ. បញ្ចមំ.

៦-៧-៨. ឆដ្ឋ-សត្តម-អដ្ឋមសិក្ខាបទំ

ឆដ្ឋសត្តមដ្ឋមេសុ អនុត្តានដ្ឋានំ នត្ថីតិ. ឆដ្ឋសត្តមដ្ឋមានិ.

៩. នវមសិក្ខាបទំ

១១៥៨. នវមេ អន្តោតិ អព្ភន្តរេ. ឥមិនា អាត្យូបសគ្គស្សត្ថំ ទស្សេតិ. ‘‘សោក’’ន្តិអាទិនា អន្តោ វាសេតិ បវេសេតីតិ អាវាសា. សោកំ អាវាសា សោកាវាសាតិ វចនត្ថំ ទស្សេតិ. ឃរំ ឃរសាមិកា អាវិសន្តិ វិយ, ឯវំ អយម្បិ សោកំ អាវិសតីតិ យោជនា. ឥតីតិ ឯវំ. យន្តិ សោកំ. ស្វាស្សាតិ សោ អស្សា. សោតិ សោកោ. អស្សាតិ សិក្ខមានាយ. អាវាសោតិ អាវាសោកាសោ. ‘‘ឯទិសា អយ’’ន្តិ ឥមិនា ‘‘អជានន្តី’’តិ ឯត្ថ អជាននាការំ ទស្សេតីតិ. នវមំ.

១០. ទសមសិក្ខាបទំ

១១៦២. ទសមេ អនាបុច្ឆាតិ ឯត្ថ ត្វាបច្ចយោ លោបោតិ អាហ ‘‘អនាបុច្ឆិត្វា’’តិ. ទ្វិក្ខត្តុន្តិ ទ្វេ វារេ. សកិន្តិ ឯកវារំ.

១១៦៣. អបុព្ពំ សមុដ្ឋានសីសំ ឥមស្សាតិ អបុព្ពសមុដ្ឋានសីសំ. ទ្វីសុបិ ឋានេសូតិ វាចាតោ ច កាយវាចាតោ ចាតិ ទ្វីសុ ឋានេសុបិ. អននុជានាបេត្វាតិ មាតាបិតូហិ ច សាមិកេន ច ន អនុជានាបេត្វាតិ. ទសមំ.

១១. ឯកាទសមសិក្ខាបទំ

១១៦៧. ឯកាទសមេ តត្ថាតិ ‘‘បារិវាសិយឆន្ទទានេនា’’តិ វចនេ. អញ្ញត្រាតិ អញ្ញំ ឋានំ.

ឯកំ អជ្ឈេសន្តីតិ ឯកំ ភិក្ខុំ ធម្មកថនត្ថាយ និយ្យោជេន្តិ. អញ្ញំ បនាតិ ឧបោសថិកតោ អញ្ញំ បន.

តត្រាតិ តេសុ ភិក្ខូសុ. សុភាសុភំ នក្ខត្តំ បឋតីតិ នក្ខត្តបាឋកោ. ទារុណន្តិ កក្ខឡំ. តេតិ ភិក្ខូ. តស្សាតិ នក្ខត្តបាឋកស្ស ភិក្ខុស្ស. ‘‘នក្ខត្តំ បដិមានេន្តំ, អត្ថោ ពាលំ ឧបច្ចគា’’តិជាតកបាឡិ (ជា. ១.១.៤៩). អយំ បនេត្ថ យោជនា – នក្ខត្តំ បដិមានេន្តំ ពាលំ អត្ថោ ហិតំ ឧបច្ចគា ឧបសមីបេ អតិក្កមិត្វា អគាតិ. ឯកាទសមំ.

១២. ទ្វាទសមសិក្ខាបទំ

១១៧០. ទ្វាទសមេ នប្បហោតីតិ ភិក្ខុនិយោ និវាសាបេតុំ ន សក្កោតីតិ. ទ្វាទសមំ.

១៣. តេរសមសិក្ខាបទំ

១១៧៥. តេរសមេ ឯកំ វស្សន្តិ ឯត្ថ វស្សសទ្ទោ សំវច្ឆរបរិយាយោ, ឧបយោគវចនញ្ច ភុម្មត្ថេ ហោតីតិ អាហ ‘‘ឯកស្មិំ សំវច្ឆរេ’’តិ. តេរសមំ.

កុមារិភូតវគ្គោ អដ្ឋមោ.