២. ទុតិយបារាជិកសិក្ខាបទំ

៦៦៤. ទុតិយេ កច្ចិ នោ សាតិ ឯត្ថ នោសទ្ទោ នុសទ្ទត្ថោតិ អាហ ‘‘កច្ចិ នុ សា’’តិ. បរិវារវិបត្តីតិ បរិជនស្ស វិនាសនំ. ‘‘អកិត្តី’’តិ ឯត្ថ សម្មុខា និន្ទំ គហេត្វា ‘‘អយសោ’’តិឥមិនា បរម្មុខា និន្ទា គហេតព្ពាតិ ទស្សេតុំ វុត្តំ ‘‘បរម្មុខគរហា វា’’តិ.

៦៦៦. ‘‘យា បារាជិកំ អាបន្នា’’តិឥមិនា ‘‘សា វា’’តិ ឯត្ថ តសទ្ទស្ស វិសយំ ទស្សេតិ. ចតុន្នន្តិ និទ្ធារណត្ថេ ចេតំ សាមិវចនំ, ចតូសូតិ អត្ថោ. បច្ឆាតិ សព្ពបារាជិកានំ បច្ឆា. ឥមស្មិំ ឱកាសេតិ បឋមតតិយបារាជិកានមន្តរេ ឋានេ. ឋបិតន្តិ សង្គីតិការេហិ និក្ខិត្តំ. ឯត្ថាតិ ឥមស្មិំ សិក្ខាបទេ. តត្រាតិ ទុដ្ឋុល្លសិក្ខាបទេតិ. ទុតិយំ.