៦. ទុតិយបវារណសិក្ខាបទំ

២៤២. ឆដ្ឋេ ន អាចរិតព្ពោតិ អនាចារោតិ វុត្តេ បណ្ណត្តិវីតិក្កមោតិ អាហ ‘‘បណ្ណត្តិវីតិក្កម’’ន្តិ. ‘‘ករោតី’’តិឥមិនា ‘‘អត្តានមាចរតី’’តិអាទីសុ វិយ ចរសទ្ទោ ករសទ្ទត្ថោតិ ទស្សេតិ. ឧបនន្ធីតិ ឯត្ថ ឧបសទ្ទោ ឧបនាហត្ថោ, នហធាតុ ពន្ធនត្ថោតិ ទស្សេន្តោ អាហ ‘‘ឧបនាហ’’ន្តិអាទិ. ជនិតោ ឧបនាហោ យេនាតិ ជនិតឧបនាហោ. ឥមិនា ‘‘ឧបនន្ធោ’’តិ បទស្ស ឧបនហតីតិ ឧបនន្ធោតិ កត្ថុត្ថំ ទស្សេតិ.

២៤៣. អភិហដ្ឋុន្តិ ឯត្ថ តុំបច្ចយោ ត្វាបច្ចយត្ថោតិ អាហ ‘‘អភិហរិត្វា’’តិ. បទភាជនេ បន វុត្តន្តិ សម្ពន្ធោ. សាធារណមេវ អត្ថន្តិ យោជនា. អស្សាតិ ភិក្ខុស្ស. តីហាការេហីតិ សាមំ ជាននេន ច អញ្ញេសមារោចនេន ច តស្សារោចនេន ចាតិ តីហិ ការណេហិ. អាសាទីយតេ មង្កុំ ករីយតេ អាសាទនំ, តំ អបេក្ខោ អាសាទនាបេក្ខោតិ ទស្សេន្តោ អាហ ‘‘អាសាទន’’ន្តិអាទិ.

យស្ស អត្ថាយ អភិហដន្តិ សម្ពន្ធោ. ឥតរស្សាតិ អភិហារកតោ អញ្ញស្ស ភុត្តស្សាតិ. ឆដ្ឋំ.