១០. វេខនសសុត្តវណ្ណនា

២៨០. សហ វត្ថុកាមេន កិលេសកាមោ គរុ គរុកាតព្ពោ ឯតស្សាតិ កាមគរុ. តេស្វេវ កាមេសុ និន្នបោណបព្ភារជ្ឈាសយោតិ កាមាធិមុត្តោ. បព្ពជ្ជាបឋមជ្ឈានាទិកំ នេក្ខម្មំ គរុ គរុកាតព្ពំ ឯតស្សាតិ នេក្ខម្មគរុ. តត្ថ និន្នបោណបព្ភារជ្ឈាសយោ នេក្ខម្មាធិមុត្តោ ស្វាយមត្ថោ យថា ឯកច្ចេ គហដ្ឋេ លព្ភតិ, ឯវំ ឯកច្ចេ អនគារេបីតិ អាហ ‘‘បព្ពជិតោបី’’តិអាទិ. អយំ បន វេខនសោ បរិព្ពាជកោ. សោ ហិ វេខនសតាបសបព្ពជ្ជំ ឧបគន្ត្វា វេខនសេន ឥមិនា ទិដ្ឋិមាទាយ សមាទិយិត្វា ឋិតត្តា ‘‘វេខនសោ’’តិ វុច្ចតិ. យថា លោកោ សយំ ឯកាទសហិ អគ្គីហិ អាទិត្តោបិ សមានោ បច្ចក្ខតោ អនុភវិយមានំ សាលាកិកំ អគ្គិសន្តាបំ វិយ អនាទិកាលានុគតសម្មាកវចរសន្តាបំ អាទិត្តតាយ ន សល្លក្ខេតិ, សម្មាសម្ពុទ្ធេន បន មហាករុណាសមុស្សាហិតមានសេន ‘‘សព្ពំ, ភិក្ខវេ, អាទិត្ត’’ន្តិ អាទិត្តបរិយាយេ (សំ. និ. ៤.២៨; មហាវ. ៥៤) ទេសិយមានេ សល្លក្ខេតិ, ឯវំ អយម្បិ អនាទិកាលបរិភាវិតំ អត្តអជ្ឈាសយេ អវដ្ឋិតំ កាមាធិមុត្តំ សរសេន អនុបធារេន្តោ សត្ថារា – ‘‘បញ្ច ខោ ឥមេ, កច្ចាន, កាមគុណា’’តិអាទិនា កាមគុណេសុ កាមសុខេ ភាសិយមានេ ‘‘កាមាធិមុត្តំ វត បព្ពជិតស្ស ចិត្ត’’ន្តិ ឧបធារេស្សតីតិ អាហ – ‘‘ឥមាយ កថាយ កថិយមានាយ អត្តនោ កាមាធិមុត្តតំ សល្លក្ខេស្សតី’’តិ. កាមគ្គសុខន្តិ កាមេតព្ពវត្ថូហិ អគ្គភូតំ សុខំ. សព្ពេ ហិ តេភូមកធម្មា កាមនីយដ្ឋេន កាមា, តេ បដិច្ច ឧប្បជ្ជនសុខតោ និព្ពានសុខមេវ អគ្គភូតំ សុខំ. យថាហ – ‘‘យាវតា, ភិក្ខវេ, ធម្មា សង្ខតា វា អសង្ខតា វា, វិរាគោ តេសំ អគ្គមក្ខាយតី’’តិ (ឥតិវុ. ៩០; អ. និ. ៤.៣៤) – ‘‘និព្ពានំ បរមំ សុខ’’ន្តិ (ម. និ. ២.២១៥, ២១៧; ធ. ប. ២០៣) ច. តេន វុត្តំ ‘‘និព្ពានំ អធិប្បេត’’ន្តិ.

២៨១. បុព្ពេនិវាសញាណលាភិនោ បុព្ពន្តំ អារព្ភ វុច្ចមានកថា អនុច្ឆវិកា តទត្ថស្ស បច្ចក្ខភាវតោ, តទភាវតោ វេខនសស្ស អននុច្ឆវិកាតិ អាហ ‘‘យស្មា…បេ… នត្ថី’’តិ. អនាគតកថាយ…បេ… នត្ថីតិ ឯត្ថាបិ ឯសេវ នយោ. អារក្ខត្ថាយាតិ ទេវតាហិ មន្តបទេហិ សហ ឋិតា តត្ថ អារក្ខត្ថាយ. អវិជ្ជាយាតិ ឥទំ លក្ខណវចនំ, តំមូលកត្តា វា សព្ពកិលេសធម្មានំ អវិជ្ជាវ គហិតា. ជាននំ បហីនកិលេសបច្ចវេក្ខណញាណេន. សេសំ សុវិញ្ញេយ្យមេវ.

វេខនសសុត្តវណ្ណនាយ លីនត្ថប្បកាសនា សមត្តា.

និដ្ឋិតា ច បរិព្ពាជកវគ្គវណ្ណនា.