៦. វត្តាទិកណ្ឌនិទ្ទេសោ

៩៦. ឧបជ្ឈាចរិយវត្តញ្ច, គមិកាគន្តុកម្បិ ច;

សេនាសនាទិវត្តញ្ច, កាតព្ពំ បិយសីលិនា.

៩៧. ហត្ថបាសេ ឋិតោ កិញ្ចិ, គហិតព្ពំ ទទេ តិធា;

គហេតុកាមោ គណ្ហេយ្យ, ទ្វិធាយំ សម្បដិគ្គហោ.

៩៨. សង្ឃាដិមុត្តរាសង្គំ, តថា អន្តរវាសកំ;

‘‘ឯតំ ឥមំ អធិដ្ឋាមិ’’, តថា ‘‘បច្ចុទ្ធរាមិ’’តិ.

៩៩. ‘‘ឥមំ ឥមានិ ឯតានិ, ឯតម្បិ ចីវរ’’ន្តិ វា;

‘‘បរិក្ខារចោឡានី’’តិ, តថា ‘‘បច្ចុទ្ធរាមិ’’តិ.

១០០. ‘‘ឯតំ ឥមំ អធិដ្ឋាមិ, បត្តំ បច្ចុទ្ធរាមិ’’តិ;

ឯវំ បច្ចុទ្ធរេធិដ្ឋេ, ចីវរាទិំ យថាវិធិ.

១០១. សញ្ចរិត្តំ វិនា សេសា, សចិត្តា គរុកន្តិមា;

អច្ឆិន្នំ បរិណតំ ហិត្វា, និស្សគ្គិយមចិត្តកំ.

១០២. បទសោធម្មំ ទុវេ សេយ្យា, ឥត្ថិយា ធម្មទេសនា;

ទុវេ សេនាសនានីបិ, សិព្ពនំ ចីវរស្សបិ.

១០៣. បវារិតំ សុរាបានំ, បញ្ចសន្និធិអាទិកំ;

ជោតិនុជ្ជាលនញ្ចេវ, កប្បពិន្ទុមនាទិកំ;

គាមប្បវេសនន្តេតេ, បាចិត្តីសុ អចិត្តកា.

១០៤. បកិណ្ណកេសុ ឧទ្ទិស្ស-កតំ ហិត្វាញ្ញមំសកំ;

ឯកត្ថរណបាវុរណំ, ឯកមញ្ចេ តុវដ្ដនំ;

ឯកតោ ភុញ្ជនញ្ចាបិ, នច្ចគីតាទិសត្តបិ.

១០៥. អកាយពន្ធនញ្ចាបិ, បត្តហត្ថកវាដកំ;

អចិត្តកមិទំ សព្ពំ, សេសមេត្ថ សចិត្តកំ.

១០៦. វីតិក្កមនចិត្តេន, សចិត្តកមចិត្តកំ;

បញ្ញត្តិជាននេនាបិ, វទន្តាចរិយា តថា.

១០៧. បុព្ពករណាទិកំ កត្វា, ឧបោសថប្បវារណំ;

នវធា ទីបិតំ សព្ពំ, កាតព្ពំ បិយសីលិនា.

១០៨. សម្មជ្ជនី បទីបោ ច, ឧទកំ អាសនេន ច;

ឧបោសថស្ស ឯតានិ, បុព្ពករណន្តិ វុច្ចតិ.

១០៩. ឆន្ទបារិសុទ្ធិឧតុក្ខានំ, ភិក្ខុគណនា ច ឱវាទោ;

ឧបោសថស្ស ឯតានិ, បុព្ពកិច្ចន្តិ វុច្ចតិ.

១១០. ឧបោសថោ យាវតិកា ច ភិក្ខូ កម្មប្បត្តា,

សភាគាបត្តិយោ ច ន វិជ្ជន្តិ;

វជ្ជនីយា ច បុគ្គលា តស្មិំ ន ហោន្តិ,

បត្តកល្លន្តិ វុច្ចតិ.

១១១. បុព្ពករណបុព្ពកិច្ចានិ សមាបេត្វា ទេសិតាបត្តិកស្ស សមគ្គស្ស ភិក្ខុសង្ឃស្ស អនុមតិយា បាតិមោក្ខំ ឧទ្ទិសិតុំ អារាធនំ ករោម.

១១២. បារិសុទ្ធិអធិដ្ឋាន-សុត្តុទ្ទេសវសា តិធា;

គណបុគ្គលសង្ឃា ច, តំ ករេយ្យុំ យថាក្កមំ.

១១៣. ចាតុទ្ទសោ បន្នរសោ, សាមគ្គី ទិនតោ តិធា;

ទិនបុគ្គលកត្តព្ពា-ការតោ តេ នវេរិតា.

១១៤. តយោ តយោតិ កត្វាន, ទិនបុគ្គលភេទតោ;

តេវាចីទ្វេកវាចីតិ, នវ វុត្តា បវារណា.

១១៥. កត្តិកន្តិមបក្ខម្ហា, ហេមំ ផគ្គុនបុណ្ណមា;

តស្ស អន្តិមបក្ខម្ហា, គិម្ហំ អាសាឡ្ហិបុណ្ណមា;

វស្សកាលំ តតោ សេសំ, ចតុវីសតុបោសថា.

១១៦. ចាតុទ្ទសា ឆ ឯតេសុ, បក្ខា តតិយសត្តមា;

ញេយ្យា បន្នរសា សេសា, អដ្ឋារស ឧបោសថា.

១១៧. ‘‘ឆន្ទំ ទម្មិ, ឆន្ទំ មេ ហរ, ឆន្ទំ មេ អារោចេហី’’តិ ឆន្ទំ ទាតព្ពំ.

១១៨. ‘‘បារិសុទ្ធិំ ទម្មិ, បារិសុទ្ធិំ មេ ហរ, បារិសុទ្ធិំ មេ អារោចេហី’’តិ បារិសុទ្ធិ ទាតព្ពា.

១១៩. ‘‘បវារណំ ទម្មិ, បវារណំ មេ ហរ, បវារណំ មេ អារោចេហិ, មមត្ថាយ បវារេហី’’តិ បវារណា ទាតព្ពា.

១២០. អាបត្តិទេសកេន ‘‘អហំ, ភន្តេ, សម្ពហុលា នានាវត្ថុកា អាបត្តិយោ អាបជ្ជិំ, តា តុម្ហមូលេ បដិទេសេមី’’តិ វត្វា បដិគ្គណ្ហន្តេន ‘‘បស្សសិ, អាវុសោ, តា អាបត្តិយោ’’តិ វុត្តេ ‘‘អាម, ភន្តេ, បស្សាមី’’តិ វត្វា បុន បដិគ្គណ្ហន្តេន ‘‘អាយតិំ, អាវុសោ, សំវរេយ្យាសី’’តិ វុត្តេ ‘‘សាធុ, សុដ្ឋុ, ភន្តេ សំវរិស្សាមី’’តិ តិក្ខត្តុំ វត្វា ទេសេតព្ពំ.

១២១. វេមតិំ អារោចេន្តេន ‘‘អហំ, ភន្តេ, សម្ពហុលាសុ នានាវត្ថុកាសុ អាបត្តីសុ វេមតិកោ, យទា និព្ពេមតិកោ ភវិស្សាមិ, តទា តា អាបត្តិយោ បដិករិស្សាមី’’តិ តិក្ខត្តុំ វត្វា អារោចេតព្ពំ.

១២២. ‘‘អជ្ជ មេ ឧបោសថោ ‘បន្នរសោ, ចាតុទ្ទសោ’តិ វា អធិដ្ឋាមី’’តិ តិក្ខត្តុំ វត្វា បុគ្គលេន អធិដ្ឋានុបោសថោ កាតព្ពោ.

១២៣. ទ្វីសុ បន ថេរេន ‘‘បរិសុទ្ធោ អហំ អាវុសោ, ‘បរិសុទ្ធោ’តិ មំ ធារេហី’’តិ តិក្ខត្តុំ វត្តព្ពំ. នវកេនបិ តថេវ វត្តព្ពំ. ‘‘ភន្តេ, ធារេថា’’តិ វចនំ វិសេសោ.

១២៤. តីសុ បន ‘‘សុណន្តុ មេ អាយស្មន្តា, អជ្ជុបោសថោ បន្នរសោ, យទាយស្មន្តានំ បត្តកល្លំ, មយំ អញ្ញមញ្ញំ បារិសុទ្ធិឧបោសថំ ករេយ្យាមា’’តិ ញត្តិំ ឋបេត្វា បដិបាដិយា វុត្តនយេន បារិសុទ្ធិឧបោសថោ កាតព្ពោ.

១២៥. ‘‘អជ្ជ មេ បវារណា ‘ចាតុទ្ទសី, បន្នរសី’តិ វា អធិដ្ឋាមី’’តិ តិក្ខត្តុំ វត្វា ឯកេន បវារេតព្ពំ.

១២៦. ទ្វីសុ បន ថេរេន ‘‘អហំ, អាវុសោ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា, វទតុ មំ អាយស្មា អនុកម្បំ ឧបាទាយ, បស្សន្តោ បដិករិស្សាមី’’តិ តិក្ខត្តុំ វត្វា បវារេតព្ពំ. នវកេនាបិ តថេវ វត្តព្ពំ. ‘‘ភន្តេ’’តិ វចនំ វិសេសោ.

១២៧. តីសុ វា ចតូសុ វា បន ‘‘សុណន្តុ មេ អាយស្មន្តា, អជ្ជ បវារណា បន្នរសី, យទាយស្មន្តានំ បត្តកល្លំ, មយំ អញ្ញមញ្ញំ បវារេយ្យាមា’’តិ ញត្តិំ ឋបេត្វា ថេរេន ‘‘អហំ, អាវុសោ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តា អនុកម្បំ ឧបាទាយ, បស្សន្តោ បដិករិស្សាមី’’តិ តិក្ខត្តុំ វត្វា បវារេតព្ពំ. នវកេហិបិ តថេវ បដិបាដិយា បវារេតព្ពំ. ‘‘ភន្តេ’’តិវចនំ វិសេសោ.

១២៨. ចតូហិ អធិកេសុ បន ‘‘សុណាតុ មេ អាវុសោ សង្ឃោ, អជ្ជ បវារណា បន្នរសី, យទិ សង្ឃស្ស បត្តកល្លំ, សង្ឃោ បវារេយ្យា’’តិ ញត្តិំ ឋបេត្វា វុឌ្ឍតរេន ‘‘សង្ឃំ, អាវុសោ, បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តោ អនុកម្បំ ឧបាទាយ, បស្សន្តោ បដិករិស្សាមី’’តិ តិក្ខត្តុំ វត្វា បវារេតព្ពំ. នវកេហិបិ តថេវ បដិបាដិយា ‘‘សង្ឃំ, ភន្តេ, បវារេមិ ទិដ្ឋេន វា សុតេន វា បរិសង្កាយ វា, វទន្តុ មំ អាយស្មន្តោ អនុកម្បំ ឧបាទាយ, បស្សន្តោ បដិករិស្សាមី’’តិ តិក្ខត្តុំ វត្វា បវារេតព្ពំ.

មូលសិក្ខា និដ្ឋិតា.

នមោ តស្ស ភគវតោ អរហតោ សម្មាសម្ពុទ្ធស្ស