នមោ តស្ស ភគវតោ អរហតោ សម្មាសម្ពុទ្ធស្ស

ខុទ្ទសិក្ខា-មូលសិក្ខា

ខុទ្ទសិក្ខា

គន្ថារម្ភកថា

(ក)

អាទិតោ ឧបសម្បន្ន-សិក្ខិតព្ពំ សមាតិកំ;

ខុទ្ទសិក្ខំ បវក្ខាមិ, វន្ទិត្វា រតនត្តយំ.

តត្រាយំ មាតិកា –

(ខ)

បារាជិកា ច ចត្តារោ, គរុកា នវ ចីវរំ;

រជនានិ ច បត្តោ ច, ថាលកា ច បវារណា.

(គ)

កាលិកា ច បដិគ្គាហោ, មំសេសុ ច អកប្បិយំ;

និស្សគ្គិយានិ បាចិត្តិ, សមណកប្ប ភូមិយោ.

(ឃ)

ឧបជ្ឈាចរិយវត្តានិ, វច្ចប្បស្សាវឋានិកំ;

អាបុច្ឆករណំ នគ្គោ, ន្ហានកប្បោ អវន្ទិយោ.

(ង)

ចម្មំ ឧបាហនា ចេវ, អនោលោកិយមញ្ជនី;

អកប្បិយសយនានិ, សមានាសនិកោបិ ច.

(ច)

អសំវាសិកោ ច កម្មំ, មិច្ឆាជីវវិវជ្ជនា;

វត្តំ វិកប្បនា ចេវ, និស្សយោ កាយពន្ធនំ.

(ឆ)

បថវី ច បរិក្ខារោ, ភេសជ្ជុគ្គហទូសនំ;

វស្សូបនាយិកា ចេវាវេភង្គិយំ បកិណ្ណកំ.

(ជ)

ទេសនា ឆន្ទទានាទិ, ឧបោសថប្បវារណា;

សំវរោ សុទ្ធិ សន្តោសោ, ចតុរក្ខា វិបស្សនាតិ.

១. បារាជិកនិទ្ទេសោ

បារាជិកា ច ចត្តារោតិ –

១. មគ្គត្តយេ អនិក្ខិត្តសិក្ខោ សន្ថតសន្ថតេ;

អល្លោកាសេ និមិត្តំ សំ, តិលមត្តម្បិ សន្ថតំ.

២. អសន្ថតមុបាទិណ្ណំ, បវេសន្តោ ចុតោថ វា;

បវេសនដ្ឋិតុទ្ធារបវិដ្ឋក្ខណសាទកោ.

៣. អាទិយេយ្យ ហរេយ្យាវហរេយ្យ ឥរិយាបថំ;

កោបេយ្យ ឋានា ចាវេយ្យ, សង្កេតំ វីតិនាមយេ.

៤. អទិន្នំ ថេយ្យចិត្តេន, ភវេ បារាជិកោថ វា;

ថេយ្យាពលកុសច្ឆន្នបរិកប្បាវហារកោ;

ភណ្ឌកាលគ្ឃទេសេហិ, បរិភោគេត្ថ និច្ឆយោ.

៥. មនុស្សវិគ្គហំ ចិច្ច, ជីវិតា វា វិយោជយេ;

សត្ថហារកំ វាស្ស មរណចេតនោ ឧបនិក្ខិបេ.

៦. គាហេយ្យ មរណូបាយំ, វទេយ្យ មរណេ គុណំ;

ចុតោ បយោគា សាហត្ថិនិស្សគ្គាណត្តិថាវរា.

៧. ឥទ្ធិវិជ្ជាមយា កាលវត្ថាវុធិរិយាបថា;

ក្រិយាវិសេសោ ឱកាសោ, ឆ អាណត្តិនិយាមកា.

៨. ឈានាទិភេទ នោសន្តមត្តនត្តុបនាយិកំ;

កត្វា កោដ្ឋាសមេកេកំ, បច្ចុប្បន្នភវស្សិតំ.

៩. អញ្ញាបទេសរហិតំ, ទីបេន្តោនធិមានិកោ;

កាយេន វាចា វិញ្ញត្តិ-បថេ ញាតេ ចុតោ ភវេ.

១០. បារាជិកេតេ ចត្តារោ, អសំវាសា យថា បុរេ;

អភព្ពា ភិក្ខុភាវាយ, សីសច្ឆិន្នោវ ជីវិតុំ.

១១. បរិយាយោ ច អាណត្តិ, តតិយេ ទុតិយេ បន;

អាណត្តិយេវ សេសេសុ, ទ្វយមេតំ ន លព្ភតិ.

១២. សេវេតុកាមតាចិត្តំ, មគ្គេ មគ្គប្បវេសនំ;

ឥមំ មេថុនធម្មស្ស, អាហុ អង្គទ្វយំ ពុធា.

១៣. មនុស្សសំ តថាសញ្ញី, ថេយ្យចិត្តញ្ច វត្ថុនោ;

គរុតា អវហារោ ច, អទិន្នាទានហេតុយោ.

១៤. បាណោ មានុស្សកោ បាណ-សញ្ញិតា ឃាតចេតនា;

បយោគោ តេន មរណំ, បញ្ចេតេ វធហេតុយោ.

១៥. អសន្តតា អត្តនិ បាបមិច្ឆតា-

យារោចនា តស្ស មនុស្សជាតិតា;

នាញ្ញាបទេសោ ច តទេវ ជាននំ,

បញ្ចេត្ថ អង្គានិ អសន្តទីបនេ.

១៦. អសាធារណា ចត្តារោ, ភិក្ខុនីនមភព្ពកា;

ឯកាទស ច វិព្ភន្តា, ភិក្ខុនី មុទុបិដ្ឋិកោ.

១៧. លម្ពី មុខេន គណ្ហន្តោ, អង្គជាតំ បរស្ស ច;

តត្ថេវាភិនិសីទន្តោ, ចត្តារោ អនុលោមិកា.

១៨. មគ្គេ មគ្គប្បវេសនា, មេថុនស្ស ឥធាគតា;

ចត្តារោតិ ចតុព្ពីស, សមោធានា បរាជិកាតិ.

២. សង្ឃាទិសេសនិទ្ទេសោ

គរុកា នវាតិ –

១៩. មោចេតុកាមតា សុក្ក-ស្សុបក្កម្ម វិមោចយំ;

អញ្ញត្រ សុបិនន្តេន, សមណោ គរុកំ ផុសេ.

២០. ឥត្ថិសញ្ញី មនុស្សិត្ថិំ, កាយសំសគ្គរាគវា;

សម្ផុសន្តោ ឧបក្កម្ម, សមណោ គរុកំ ផុសេ.

២១. តថា សុណន្តិំ វិញ្ញុញ្ច, មគ្គំ វារព្ភ មេថុនំ;

ទុដ្ឋុល្លវាចារាគេន, ឱភាសេត្វា គរុំ ផុសេ.

២២. វត្វាត្តកាមុបដ្ឋាន-វណ្ណំ មេថុនរាគិនោ;

វាចា មេថុនយុត្តេន, គរុំ មេថុនយាចនេ.

២៣. បដិគ្គហេត្វា សន្ទេសំ, ឥត្ថិយា បុរិសស្ស វា;

វីមំសិត្វា ហរំ បច្ចា, សមណោ គរុកំ ផុសេ.

២៤. សំយាចិតបរិក្ខារំ, កត្វាទេសិតវត្ថុកំ;

កុដិំ បមាណាតិក្កន្តំ, អត្តុទ្ទេសំ គរុំ ផុសេ.

២៥. មហល្លកំ វិហារំ វា, កត្វាទេសិតវត្ថុកំ;

អត្តនោ វសនត្ថាយ, សមណោ គរុកំ ផុសេ.

២៦. អមូលកេន ចោទេន្តោ, ចោទាបេន្តោវ វត្ថុនា;

អន្តិមេន ច ចាវេតុំ, សុណមានំ គរុំ ផុសេ.

២៧. អញ្ញស្ស កិរិយំ ទិស្វា, តេន លេសេន ចោទយំ;

វត្ថុនា អន្តិមេនាញ្ញំ, ចាវេតុំ គរុកំ ផុសេ.

២៨. ឆាទេតិ ជានមាបន្នំ, បរិវសេយ្យ តាវតា;

ចរេយ្យ សង្ឃេ មានត្តំ, បរិវុត្ថោ ឆ រត្តិយោ.

ចិណ្ណមានត្តមព្ភេយ្យ, តំ សង្ឃោ វីសតីគណោ.

២៩. អាបត្តិនុក្ខិត្តមនន្តរាយ

បហុត្តតាយោ តថសញ្ញិតា ច;

ឆាទេតុកាមោ អថ ឆាទនាតិ,

ឆន្នា ទសង្គេហ្យរុណុគ្គមម្ហីតិ.

៣. ចីវរនិទ្ទេសោ

ចីវរន្តិ –

៣០. ខោមកោសេយ្យកប្បាស-សាណភង្គានិ កម្ពលំ;

កប្បិយានិ ឆឡេតានិ, សានុលោមានិ ជាតិតោ.

៣១. ទុកូលញ្ចេវ បដ្ដុណ្ណ-បដំ សោមារចីនជំ;

ឥទ្ធិជំ ទេវទិន្នញ្ច, តស្ស តស្សានុលោមិកំ.

៣២. តិចីវរំ បរិក្ខារ-ចោឡំ វស្សិកសាដិកំ;

អធិដ្ឋេ ន វិកប្បេយ្យ, មុខបុញ្ឆននិសីទនំ.

៣៣. បច្ចត្ថរណកំ កណ្ឌុ-ច្ឆាទិមេត្ថ តិចីវរំ;

ន វសេយ្យ វិនេកាហំ, ចាតុមាសំ និសីទនំ.

៣៤. ‘‘ឥមំ សង្ឃាដិំធិដ្ឋាមិ’’, សង្ឃាដិមិច្ចធិដ្ឋយេ;

អហត្ថបាសមេតន្តិ, សេសេសុបិ អយំ នយោ.

៣៥. អធិដ្ឋហន្តោ សង្ឃាដិ-ប្បភុតិំ បុព្ពចីវរំ;

បច្ចុទ្ធរិត្វាធិដ្ឋេយ្យ, បត្តាធិដ្ឋហនេ តថា.

៣៦. ឯតំ ឥមំ វ សង្ឃាដិំ, សំសេ បច្ចុទ្ធរាមិតិ;

ឯវំ សព្ពានិ នាមេន, វត្វា បច្ចុទ្ធរេ វិទូ.

៣៧. សង្ឃាដិ បច្ឆិមន្តេន, ទីឃសោ មុដ្ឋិបញ្ចកោ;

ឧត្តមន្តេន សុគត-ចីវរូនាបិ វដ្ដតិ.

៣៨. មុដ្ឋិត្តិកញ្ច តិរិយំ, តថា ឯកំសិកស្សបិ;

អន្តរវាសកោ ចាបិ, ទីឃសោ មុដ្ឋិបញ្ចកោ;

អឌ្ឍតេយ្យោ ទ្វិហត្ថោ វា, តិរិយន្តេន វដ្ដតិ.

៣៩. និសីទនស្ស ទីឃេន, វិទត្ថិ ទ្វេ វិសាលតោ;

ទិយឌ្ឍំ ទសា វិទត្ថិ, សុគតស្ស វិទត្ថិយា.

៤០. កណ្ឌុប្បដិច្ឆាទិកស្ស, តិរិយំ ទ្វេ វិទត្ថិយោ;

ទីឃន្តតោ ចតស្សោវ, សុគតស្ស វិទត្ថិយា.

៤១. វស្សិកសាដិកាយាបិ, ទីឃសោ ឆ វិទត្ថិយោ;

តិរិយំ អឌ្ឍតេយ្យាវ, សុគតស្ស វិទត្ថិយា.

៤២. ឯត្ថ ឆេទនបាចិត្តិ, ករោន្តស្ស តទុត្តរិ;

បច្ចត្ថរណ មុខចោឡា, អាកង្ខិតប្បមាណិកា.

៤៣. បរិក្ខារចោឡេ គណនា, បមាណំ វា ន ទីបិតំ;

តថា វត្វា អធិដ្ឋេយ្យ, ថវិកាទិំ វិកប្បិយំ.

៤៤. អហតាហតកប្បានំ, សង្ឃាដិ ទិគុណា សិយា;

ឯកច្ចិយោត្តរាសង្គោ, តថា អន្តរវាសកោ.

៤៥. ឧតុទ្ធដាន ទុស្សានំ, សង្ឃាដិ ច ចតុគ្គុណា;

ភវេយ្យុំ ទិគុណា សេសា, បំសុកូលេ យថារុចិ.

៤៦. តីសុ ទ្វេ វាបិ ឯកំ វា, ឆិន្ទិតព្ពំ បហោតិ យំ;

សព្ពេសុ អប្បហោន្តេសុ, អន្វាធិមាទិយេយ្យ វា;

អច្ឆិន្នញ្ច អនាទិណ្ណំ, ន ធារេយ្យ តិចីវរំ.

៤៧. គាមេ និវេសនេ ឧទ្ទោ-សិតបាសាទហម្មិយេ;

នាវាដ្ដមាឡអារាមេ, សត្ថខេត្តខលេ ទុមេ.

៤៨. អជ្ឈោកាសេ វិហារេ វា, និក្ខិបិត្វា តិចីវរំ;

ភិក្ខុសម្មុតិយាញ្ញត្រ, វិប្បវត្ថុំ ន វដ្ដតិ.

៤៩. រោគវស្សានបរិយន្តា, កណ្ឌុច្ឆាទិកសាដិកា;

តតោ បរំ វិកប្បេយ្យ, សេសា អបរិយន្តិកា.

៥០. បច្ចត្ថរណ បរិក្ខារ-មុខបុញ្ឆនចោឡកំ;

ទសំ ប្យរត្តនាទិណ្ណកប្បំ លព្ភំ និសីទនំ.

៥១. អទសំ រជិតំយេវ, សេសចីវរបញ្ចកំ;

កប្បតាទិណ្ណកប្បំវ, សទសំវ និសីទនំ.

៥២. អនធិដ្ឋិតនិស្សដ្ឋំ, កប្បេត្វា បរិភុញ្ជយេ;

ហត្ថទីឃំ តតោបឌ្ឍ-វិត្ថារញ្ច វិកប្បិយំ.

៥៣. តិចីវរស្ស ភិក្ខុស្ស, សព្ពមេតំ បកាសិតំ;

បរិក្ខារចោឡិយោ សព្ពំ, តថា វត្វា អធិដ្ឋតិ.

៥៤. អច្ឆេទវិស្សជ្ជនគាហវិព្ភមា,