៥. បកិណ្ណកនិទ្ទេសោ

៥៣. សង្ឃិកំ គរុភណ្ឌំ យោ, ទេតិ អញ្ញស្ស ឥស្សរោ;

ថុល្លច្ចយំ យថាវត្ថុំ, ថេយ្យា បារាជិកាទិបិ.

៥៤. កុសាទិមយចីរានិ, កម្ពលំ កេសវាលជំ;

សមយំ វិនា ធារយតោ, លូកបក្ខាជិនក្ខិបំ.

៥៥. សត្ថកម្មេ វត្ថិកម្មេ, សំ និមិត្តញ្ច ឆិន្ទតោ;

ថុល្លច្ចយំ មនុស្សានំ, មំសាទិភោជនេបិ វា.

៥៦. កទលេរកក្កទុស្សានិ, បោត្ថកំ សព្ពនីលកំ;

សព្ពបីតាទិកញ្ចាបិ, ធារយន្តស្ស ទុក្កដំ.

៥៧. ហត្ថិស្សុរគសោណានំ, សីហព្យគ្ឃច្ឆទីបិនំ;

តរច្ឆស្ស ច មំសាទិំ, ឧទ្ទិស្សកតកម្បិ ច.

៥៨. អនាបុច្ឆិតមំសញ្ច, ភុញ្ជតោ ទុក្កដំ សិយា;

យាតានុបុព្ពំ ហិត្វាន, ទកតិត្ថាទិកំ វជេ.

៥៩. សហសា វុព្ភជិត្វាន, បវិសេ និក្ខមេយ្យ វា;

វច្ចបស្សាវកុដិកំ, វិនា ឧក្កាសិកំ វិសេ.

៦០. និត្ថុនន្តោ ករេ វច្ចំ, ទន្តកដ្ឋញ្ច ខាទយំ;

វច្ចបស្សាវទោណីនំ, ពហិ វច្ចាទិកំ ករេ.

៦១. ខរេន ចាវលេខេយ្យ, កដ្ឋំ បាតេយ្យ កូបកេ;

ឩហតញ្ច ន ធោវេយ្យ, ឧក្លាបញ្ច ន សោធយេ.

៦២. ទកកិច្ចំ ករោន្តស្ស, កត្វា ‘‘ចបុចបូ’’តិ ច;

អនជ្ឈិដ្ឋោវ ថេរេន, បាតិមោក្ខម្បិ ឧទ្ទិសេ.

៦៣. អនាបុច្ឆាយ បញ្ហស្ស, កថនេ វិស្សជ្ជនេបិ ច;

សជ្ឈាយករណេ ទីប-ជាលនេ វិជ្ឈាបនេបិ ច.

៦៤. វាតបានកវាដានិ, វិវរេយ្យ ថកេយ្យ វា;

វន្ទនាទិំ ករេ នគ្គោ, គមនំ ភោជនាទិកំ.

៦៥. បរិកម្មំ ករេ ការេ, តិបដិច្ឆន្នកំ វិនា;

កាយំ នហាយំ ឃំសេយ្យ, កុដ្ដេ ថម្ភេ តរុម្ហិ វា.

៦៦. កុរុវិន្ទកសុត្តេន, អញ្ញមញ្ញស្ស កាយតោ;

អគិលានោ ពហារាមេ, ចរេយ្យ សឧបាហនោ.

៦៧. ឧបាហនំ យោ ធារេតិ, សព្ពនីលាទិកម្បិ ច;

និមិត្តំ ឥត្ថិយា រត្តោ, មុខំ វា ភិក្ខទាយិយា.

៦៨. ឧជ្ឈានសញ្ញី អញ្ញស្ស, បត្តំ វា អត្តនោ មុខំ;

អាទាសាទិម្ហិ បស្សេយ្យ, ឧច្ចាសនមហាសនេ.

៦៩. និសជ្ជាទិំ ករោន្តស្ស, ទុក្កដំ វន្ទនេបិ ច;

ឧក្ខិត្តានុបសម្បន្ន-នានាសំវាសកាទិនំ.

៧០. ឯកតោ បណ្ឌកិត្ថីហិ, ឧភតោព្យញ្ជនេន វា;

ទីឃាសនេ និសីទេយ្យ, អទីឃេ អាសនេ បន.

៧១. អសមានាសនិកេន, មញ្ចបីឋេ សយេយ្យ វា;

កុលសង្គហត្ថំ ទទតោ, ផលបុប្ផាទិកម្បិ ច.

៧២. គន្ថិមាទិំ ករេ ការេ, ជិនវារិតបច្ចយេ;

បរិភុញ្ជេយ្យ អព្យត្តោ, អនិស្សាយ វសេយ្យ វា.

៧៣. អនុញ្ញាតេហិ អញ្ញស្ស, ភេសជ្ជំ វា ករេ វទេ;

ករេ សាបត្តិកោ ភិក្ខុ, ឧបោសថប្បវារណំ.

៧៤. ទ្វារពន្ធាទិកេ ឋានេ, បរិវត្តកវាដកំ;

អបិធាយ វិនាភោគំ, និយោគំ វា សយេ ទិវា.

៧៥. ធញ្ញិត្ថិរូបរតនំ, អាវុធិត្ថិបសាធនំ;

តូរិយភណ្ឌំ ផលំ រុក្ខេ, បុព្ពណ្ណាទិញ្ច អាមសេ.

៧៦. សសិត្ថោទកតេលេហិ, ផណហត្ថផណេហិ វា;

កេសមោសណ្ឋនេកស្មិំ, ភាជនេ ភោជនេបិ ច.

៧៧. ឯកត្ថរណបាវុរណា, សយេយ្យុំ ទ្វេកមញ្ចកេ;

ទន្តកដ្ឋញ្ច ខាទេយ្យ, អធិកូនំ បមាណតោ.

៧៨. យោជេតិ វា យោជាបេតិ, នច្ចំ គីតញ្ច វាទិតំ;

ទស្សនំ សវនំ តេសំ, ករោន្តស្ស ច ទុក្កដំ.

៧៩. វីហាទិរោបិមេ ចាបិ, ពហិបាការកុដ្ដកេ;

វច្ចាទិឆឌ្ឌនាទិម្ហិ, ទីឃកេសាទិធារណេ.

៨០. នខមដ្ឋករណាទិម្ហិ, សម្ពាធេ លោមហារណេ;

បរិកម្មកតំ ភូមិំ, អក្កមេ សឧបាហនោ.

៨១. អធោតអល្លបាទេហិ, សង្ឃិកំ មញ្ចបីឋកំ;

បរិកម្មកតំ ភិត្តិំ, អាមសន្តស្ស ទុក្កដំ.

៨២. សង្ឃាដិយាបិ បល្លត្ថេ, ទុប្បរិភុញ្ជេយ្យ ចីវរំ;

អកាយពន្ធនោ គាមំ, វជេ កត្វាន វច្ចកំ.

៨៣. នាចមេយ្យ ទកេ សន្តេ, សមាទេយ្យ អកប្បិយេ;

ទេសនារោចនាទិម្ហិ, សភាគាបត្តិយាបិ ច.

៨៤. ន វសេ វស្សំ វិសំវាទេ, សុទ្ធចិត្តេ បដិស្សវំ;

វស្សំ វសិត្វា គមនេ, អននុញ្ញាតកិច្ចតោ.

៨៥. វិនាបទំ តរុស្សុទ្ធំ, បោរិសម្ហាភិរូហណេ;

អបរិស្សាវនោទ្ធានំ, វជេ តំ យាចតោ ន ទេ.

៨៦. អត្តនោ ឃាតនេ ឥត្ថិ-រូបាទិំ ការយេយ្យ វា;

ហិត្វា មាលាទិកំ ចិត្តំ, ជាតកាទិំ សយំ ករេ.

៨៧. ភុញ្ជន្តមុដ្ឋបេ តស្ស, សាលាទីសុ និសីទតោ;

វុឌ្ឍានំ បន ឱកាសំ, អទត្វា វាបិ ទុក្កដំ.

៨៨. យានាទិមភិរូហេយ្យ, កល្លកោ រតនត្តយំ;

អារព្ភ វទេ ទវញ្ញ-បរិសាយោបលាលនេ.

៨៩. កាយាទិំ វិវរិត្វាន, ភិក្ខុនីនំ ន ទស្សយេ;

វាចេ លោកាយតំ បលិតំ, គណ្ហេយ្យ គណ្ហាបេយ្យ វា.

៩០. យត្ថ កត្ថចិ បេឡាយំ, ភុញ្ជតោ បត្តហត្ថកោ;

វាតបានកវាដំ វា, បណាមេ សោទកម្បិ ច.

៩១. ឧណ្ហេយ្យ បដិសាមេយ្យ, អតិឧណ្ហេយ្យ វោទកំ;

ឋបេយ្យ ភូមិយំ បត្តំ, អង្កេ វា មញ្ចបីឋកេ.

៩២. មិឌ្ឍន្តេ បរិភណ្ឌន្តេ, បាទេ ឆត្តេ ឋបេតិ វា;

ចលកាទិំ ឋបេ បត្តំ, បត្តេ វា ហត្ថធោវនេ.

៩៣. បត្តេន នីហរន្តស្ស, ឧច្ឆិដ្ឋមុទកម្បិ ច;

អកប្បិយម្បិ បត្តំ វា, បរិភុញ្ជេយ្យ ទុក្កដំ.

៩៤. វទេ ‘‘ជីវា’’តិ ខិបិតេ, ន សិក្ខតិ អនាទរោ;

បរិមណ្ឌលកាទិម្ហិ, សេខិយេ ទុក្កដំ សិយា.

៩៥. យោ ភណ្ឌគារេ បយុតោវ ភណ្ឌកំ,

មាតូន បាចិត្តិយមស្ស គោបយេ;

ទវាយ ហីនេនបិ ជាតិអាទិនា,

វទេយ្យ ទុព្ភាសិតមុត្តមម្បិ យោតិ.