២. គរុកាបត្តិនិទ្ទេសោ

១០. មោចេតុកាមចិត្តេន, ឧបក្កម្ម វិមោចយំ;

សុក្កមញ្ញត្រ សុបិនា, សមណោ គរុកំ ផុសេ.

១១. កាយសំសគ្គរាគេន, មនុស្សិត្ថិំ បរាមសំ;

ឥត្ថិសញ្ញី ឧបក្កម្ម, សមណោ គរុកំ ផុសេ.

១២. ទុដ្ឋុល្លវាចស្សាទេន, មគ្គំ វារព្ភ មេថុនំ;

ឱភាសន្តោ មនុស្សិត្ថិំ, សុណមានំ គរុំ ផុសេ.

១៣. វណ្ណំ វត្វាត្តនោកាម-បារិចរិយាយ មេថុនំ;

ឥត្ថិំ មេថុនរាគេន, យាចមានោ គរុំ ផុសេ.

១៤. សន្ទេសំ បដិគ្គណ្ហិត្វា, បុរិសស្សិត្ថិយាបិ វា;

វីមំសិត្វា ហរំបច្ចា, សមណោ គរុកំ ផុសេ.

១៥. ចាវេតុកាមោ ចោទេន្តោ, អមូលន្តិមវត្ថុនា;

ចោទាបយំ វា សមណោ, សុណមានំ គរុំ ផុសេ.

១៦. លេសមត្តំ ឧបាទាយ, អមូលន្តិមវត្ថុនា;

ចាវេតុកាមោ ចោទេន្តោ, សុណមានំ គរុំ ផុសេតិ.