៣. និស្សគ្គិយនិទ្ទេសោ

១៧. វិកប្បនមធិដ្ឋាន-មកត្វា កាលចីវរំ;

ទសាហមតិមាបេតិ, តស្ស និស្សគ្គិយំ សិយា.

១៨. ភិក្ខុសម្មុតិយាញ្ញត្រ, តិចីវរមធិដ្ឋិតំ;

ឯកាហមតិមាបេតិ, និស្សគ្គិ សមយំ វិនា.

១៩. អញ្ញាតិកា ភិក្ខុនិយា, បុរាណចីវរំ បន;

ធោវាបេតិ រជាបេតិ, អាកោដាបេតិ តំ សិយា.

២០. អញ្ញាតិកា ភិក្ខុនិយា, ហត្ថតោ កិញ្ចិ មូលកំ;

អទត្វា ចីវរាទានេ, និស្សគ្គិយមុទីរិតំ.

២១. អប្បវារិតមញ្ញាតិំ, វិញ្ញាបេន្តស្ស ចីវរំ;

អញ្ញត្រ សមយា តស្ស, និស្សគ្គិយមុទីរិតំ.

២២. រជតំ ជាតរូបំ វា, មាសកំ វា កហាបណំ;

គណ្ហេយ្យ វា គណ្ហាបេយ្យ, និស្សគ្គិ សាទិយេយ្យ វា.

២៣. បរិវត្តេយ្យ និស្សគ្គិ, រជតាទិ ចតុព្ពិធំ;

កប្បិយំ កប្បិយេនាបិ, ឋបេត្វា សហធម្មិកេ.

២៤. វិកប្បនមធិដ្ឋាន-មកត្វាន បមាណិកំ;

ទសាហមតិមាបេតិ, បត្តំ និស្សគ្គិយំ សិយា.

២៥. បញ្ចពន្ធនតោ ឩន-បត្តេ សតិ បរំ បន;

វិញ្ញាបេតិ នវំ បត្តំ, តស្ស និស្សគ្គិយំ សិយា.

២៦. បដិគ្គហេត្វា ភុញ្ជន្តោ, សប្បិតេលាទិកំ បន;

សត្តាហមតិមាបេតិ, តស្ស និស្សគ្គិយំ សិយា.

២៧. ភិក្ខុស្ស ចីវរំ ទត្វា, អច្ឆិន្ទន្តស្ស តំ បុន;

សកសញ្ញាយ និស្សគ្គិ, អច្ឆិន្ទាបយតោបិ វា.

២៨. អប្បវារិតមញ្ញាតិំ, សុត្តំ យាចិយ ចីវរំ;

វាយាបេន្តស្ស និស្សគ្គិ, វិនា ញាតិប្បវារិតេ.

២៩. ជានន្តោ ភិក្ខុ សង្ឃស្ស, លាភំ បរិណតំ បន;

អត្តនោ បរិណាមេតិ, តស្ស និស្សគ្គិយំ សិយាតិ.