២៧. អសំវាសនិទ្ទេសវណ្ណនា

១៩៨. ឧក្ខិត្តោតិ កម្មនានាសំវាសកសង្ខាតោ អាបត្តិយា អទស្សនេ, អប្បដិកម្មេ, បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ. អនុបសម្បន្នោតិ សិក្ខមានសាមណេរសាមណេរិសិក្ខាបច្ចក្ខាតសង្ខាតោ អនុបសម្បន្នោ. ឆិន្នមូលកោតិ អន្តិមវត្ថុអជ្ឈាបន្នោ. ឧក្ខិត្តកេសុ ‘‘ធម្មវាទិនោ ឯតេ’’តិ ឧប្បន្នាយ លទ្ធិយា នានាភូតោ សំវាសោ ឯតស្សាតិ នានាសំវាសោ, ឧក្ខិត្តានុវត្តកសង្ខាតោ លទ្ធិនានាសំវាសកោ. សីមតោ និគ្គតា និស្សីមា, សីមន្តរិកា ពហិសីមា ច, តត្ថ ហត្ថបាសេ ចេបិ ឋិតោ, សីមានានាសំវាសកោ និស្សីមដ្ឋិតោ. វេហាយសេ អាកាសេ ឋិតោ វេហាយសណ្ឋិតោ ពិន្ទាគមេន. តត្ថ ‘‘នានាសំវាសោ ចា’’តិអាទិនា សមាហារទ្វន្ទេបិ ក្វចិ នបុំសកលិង្គំ ព្យភិចរតីតិ នបុំសកត្តាភាវោ យថា ‘‘មគ្គាមគ្គោ’’តិ. ឯកកម្មំ ឯកុទ្ទេសោ សមសិក្ខតាតិ អយំ តិវិធោបិ សំវាសោ នាម. សោ យេសំ នត្ថិ, តេ អសំវាសា. ឯតេ ហត្ថបាសតោ ពហិករណវសេន វជ្ជេតព្ពា. ឯតេសុ ហិ តិវិធេ ឧក្ខិត្តកេ សតិ ឧបោសថាទិកំ កម្មំ ករោន្តស្ស បាចិត្តិយំ, ឥតរេសុ ទុក្កដន្តិ.

អសំវាសនិទ្ទេសវណ្ណនា និដ្ឋិតា.