១៩. ន្ហានកប្បនិទ្ទេសវណ្ណនា

១៦៨. កប្បនំ កប្បិយតា កប្បោ, ន្ហានេ កប្បោ ន្ហានកប្បោ. នវកោ ថេរានំ បុរតោ ឧបរិ វា ន ច ន្ហាយេយ្យាតិ សម្ពន្ធោ. ន ចាតិ នយេវ. បុរតោតិ អភិមុខេ. ឧបរីតិ នទិយា ឧបរិ.

១៦៩-១៧១. កុដ្ដត្ថម្ភតរុដ្ដានេ កាយំ ន ឃំសយេតិ សម្ពន្ធោ. តត្ថ កុដ្ដំ នាម ឥដ្ឋកទារុសិលាភិត្តិ. ថម្ភោ នាម នហានតិត្ថេ និខនិត្វា ឋបិតោ. តរូតិ រុក្ខោ. អដ្ដានំ នាម តច្ឆេត្វា អដ្ឋបទាការេន រាជិយោ ឆិន្ទិត្វា នហានតិត្ថេ និខាតផលកំ. គន្ធព្ពហត្ថេន វា…បេ… មល្លកេន វា កាយំ សរីរេន វា អញ្ញមញ្ញំ ន ឃំសយេតិ សម្ពន្ធោ. គន្ធព្ពហត្ថេនាតិ ទារុមយហត្ថេន. កុរុវិន្ទកសុត្តិយាតិ កុរុវិន្ទកបាសាណចុណ្ណានិ លាខាយ ពន្ធិត្វា កតគុឡិកាវលិយា សុត្តេន អាវុណិតសុត្តិយា. មល្លកេនាតិ មករទន្តកេ ឆិន្ទិត្វា បទុមកណ្ណិកសណ្ឋានេន កតមល្លកេន. សរីរេនាតិ អត្តនោ កាយេន. អញ្ញមញ្ញស្ស អញ្ញមញ្ញំ កិរិយាករណសង្ខាតេ កិរិយាព្យភិហារេ ទ្វិត្តំ. កបាល…បេ… បុថុបាណិ ច សព្ពេសំ វដ្ដតីតិ សម្ពន្ធោ. កបាលញ្ច ឥដ្ឋកា ច, តាសំ ខណ្ឌានិ. បុថុបាណីតិ បុថុ នានា បាណិ បុថុបាណិ, ហត្ថបរិកម្មំ រុឡ្ហីវសេន. សព្ពេសន្តិ គិលានាគិលានានំ. គិលានស្ស អកតមល្លកំ វដ្ដតីតិ សម្ពន្ធោ. អកតមល្លកំ នាម កតមល្លកវិបរីតំ. ផេណំ នាម សមុទ្ទផេណន្តិ.

ន្ហានកប្បនិទ្ទេសវណ្ណនា និដ្ឋិតា.