២០. អវន្ទិយនិទ្ទេសវណ្ណនា

១៧២. ឧក្ខិត្តោតិ អាបត្តិយា អទស្សនេ អប្បដិកម្មេ ច ឧក្ខិត្តកោ បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោតិ តិវិធោ ឧក្ខិត្តកោ. នានាសំវាសកោ នាម លទ្ធិនានាសំវាសកោបិ កម្មនានាសំវាសកោបិ. គរុកដ្ឋោ ចាតិ បារិវាសិកោ មូលាយបដិកស្សនារហោ មានត្តារហោ មានត្តចារី អព្ភានារហោ ច ឥធ គរុកដ្ឋោតិ អធិប្បេតោ. ឥមេហិ បន អញ្ញមញ្ញំ វន្ទិតុំ វដ្ដតីតិ.

អវន្ទិយនិទ្ទេសវណ្ណនា និដ្ឋិតា.