១៨. នគ្គនិទ្ទេសវណ្ណនា

១៦៦. ‘‘វជេ’’តិអាទីសុ ន-សទ្ទោ សម្ពន្ធិតព្ពោ. តត្ថ បន យថានុរូបភោជនាទិកំ កម្មវចនំ អជ្ឈាហរិត្វា ‘‘ភោជនំ ន ភុញ្ជេ’’តិអាទិនា អត្ថោ វេទិតព្ពោ.

១៦៧. ន ករេតិ ហត្ថកម្មាទិកំ បរិកម្មំ សយម្បិ ន ករេយ្យាតិ អត្ថោ. បដិច្ឆាទីសូតិ និទ្ធារណេ ភុម្មំ, ជន្តាឃរុទកវត្ថប្បដិច្ឆាទីនំ មជ្ឈេតិ អត្ថោ. បរិកម្មេ ទុវេ កប្បិយាតិ សម្ពន្ធោ. បរិកម្មេតិ ជន្តាឃរេ ឧទកេបិ ឧបជ្ឈាយាទីនំ កត្តព្ពបរិកម្មវិសយេ, ន អភិវាទនាទីសុ. ទុវេតិ ជន្តាឃរឧទកប្បដិច្ឆាទយោ. ឆាទេន្តិ ឯតាយាតិ ឆាទិ, វត្ថស្ស ឆាទិ វត្ថច្ឆាទិ. សព្ពត្ថាតិ សព្ពកម្មេសូតិ.

នគ្គនិទ្ទេសវណ្ណនា និដ្ឋិតា.