១៦. វច្ចបស្សាវដ្ឋានិកនិទ្ទេសវណ្ណនា

១៥៦. វច្ចបស្សាវដ្ឋានិកន្តិ ឋានម្ហិ ឋានេ វា ភវំ វច្ចបស្សាវដ្ឋានិកំ. យថាវុឌ្ឍំ វច្ចំ ន ករេយ្យាតិ សម្ពន្ធោ. យេ យេ វុឌ្ឍា យថាវុឌ្ឍំ, អាគតប្បដិបាដិំ ហិត្វា វុឌ្ឍប្បដិបាដិយាតិ អត្ថោ. វច្ចន្តិ ឧបលក្ខណមត្តំ, បស្សាវញ្ច នហានញ្ច ន ករេយ្យាតិ អធិប្បាយោ. តទេវ សមត្ថេតិ ‘‘យាតានុបុព្ពិយា’’តិអាទិនា. យាតានុបុព្ពិយាតិ យាតានំ គតានំ អនុបុព្ពិ អនុក្កមោ យាតានុបុព្ពិ, តាយ. វច្ច…បេ… តិត្ថញ្ចាតិ ឯតំ តយំ លព្ភតីតិ អត្ថោ, ភិក្ខុនាតិ វិញ្ញាយតិ.

១៥៧. ឧព្ភជិត្វា ច សហសា ច នោ បវិសេយ្យាតិ សម្ពន្ធោ. ឧព្ភជិត្វាតិ ចីវរំ ទូរតោវ ឧក្ខិបិត្វា. សហសាតិ សីឃំ. ឧក្កាសិត្វា បវិសេយ្យាតិ យោជនា.

១៥៨. វច្ចបស្សាវទោណីនំ ពហីតិ សម្ពន្ធោ. ឧភយន្តិ វច្ចម្បិ បស្សាវម្បិ.

១៥៩. កូបេតិ វច្ចាវាដេ. កដ្ឋន្តិ អវលេខនកដ្ឋំ. ផរុសេនាតិ ខរេន អវលេខនកដ្ឋេន. ឧហតញ្ចាបីតិ អត្តនា វា បរេន វា ឧហតញ្ចាបិ វច្ចមក្ខិតញ្ចាបីតិ អត្ថោ. ធោវយេតិ សតិ ឧទកេ, ឧទកេ អសតិ កដ្ឋេនបិ សោធេយ្យ.

១៦០. ន និក្ខមេតិ ន និក្ខមេយ្យ. ចបុ ចបូតិ អនុករណំ, វិច្ឆាយំ ទ្វិត្តេ ចបុ ចបុ កត្វាតិ កិរិយាវិសេសនំ. នាចមេយ្យាតិ ន ធោវេយ្យ. សតិ បន ឧទកេ អាចមិតព្ពំ, អសតិ យេន កេនចិ បុញ្ឆិត្វា គន្តព្ពំ, សព្ពសាធារណដ្ឋានេ ច អាចមនកុម្ភិយា ឧទកំ ន សេសេតព្ពំ. ឧក្លាបន្តិ កចវរំ. វិសោធយេតិ វិហារសោធនេ វិយ វច្ចបស្សាវកុដិយោ, បរិវេណកោដ្ឋកេ ច សម្មជ្ជេយ្យ. សព្ពត្ថេវ ច បន វត្តភេទេ ទុក្កដំ.

វច្ចបស្សាវដ្ឋានិកនិទ្ទេសវណ្ណនា និដ្ឋិតា.