៤៨. សន្តោសនិទ្ទេសវណ្ណនា

៤៥៩. ‘‘ចត្តារិមានិ, ភិក្ខវេ, អប្បានិ ចេវ សុលភានិ ច, តានិ ច អនវជ្ជានិ. កតមានិ ចត្តារិ? បំសុកូលំ, ភិក្ខវេ, ចីវរានំ អប្បញ្ច សុលភញ្ច, តញ្ច អនវជ្ជំ. បិណ្ឌិយាលោបោ, ភិក្ខវេ, ភោជនានំ អប្បញ្ច សុលភញ្ច, តញ្ច អនវជ្ជំ. រុក្ខមូលំ, ភិក្ខវេ, សេនាសនានំ អប្បញ្ច សុលភញ្ច, តញ្ច អនវជ្ជំ. បូតិមុត្តភេសជ្ជំ, ភិក្ខវេ, ភេសជ្ជានំ អប្បញ្ច សុលភញ្ច, តញ្ច អនវជ្ជំ. ឥមានិ ខោ, ភិក្ខវេ, ចត្តារិ អប្បានិ ចេវ សុលភានិ ច, តានិ ច អនវជ្ជានី’’តិ (អ. និ. ៤.២៧; ឥតិវុ. ១០១) វចនតោ ‘‘អប្បេនា’’តិអាទិ វុត្តំ.

សន្តុដ្ឋោតិ ឯត្ថ យថាលាភយថាពលយថាសារុប្បសន្តោសានំ វសេន ឯកេកស្មិំ បច្ចយេ តយោ តយោ កត្វា ចតូសុ បច្ចយេសុ ទ្វាទស សន្តោសា ហោន្តិ. មត្តញ្ញូតិ ឯត្ថ (ម. និ. អដ្ឋ. ១.៤២២; សំ. និ. អដ្ឋ. ៣.៤.២៣៩; អ. និ. អដ្ឋ. ២.៣.១៦; ឥតិវុ. អដ្ឋ. ២៨; ធ. ស. អដ្ឋ. ១២៤-១៣៤) ចត្តារោ មត្តា បរិយេសនមត្តា បដិគ្គហណមត្តា បរិភោគមត្តា វិស្សជ្ជនមត្តាតិ. ឥតរីតរេន យាបេន្តោ សុភរោ នាម. សន្តោសវិនិច្ឆយោ.

សន្តោសនិទ្ទេសវណ្ណនា និដ្ឋិតា.