៣៦. ភេសជ្ជនិទ្ទេសវណ្ណនា

២៧៤-៥. សហធម្មិនំ លព្ភំ ភេសជ្ជករណន្តិ សម្ពន្ធោ. ន កេវលំ បញ្ចន្នំ សហធម្មិកានំយេវ ភិក្ខាចរិយវិញ្ញត្តិសកេហិ ភេសជ្ជករណំ លព្ភតិ, អថ ខោ អបរេសម្បិ បញ្ចន្នំ លព្ភតិ, តេ ទស្សេន្តោ ‘‘បិតូន’’ន្តិអាទិមាហ. បិតូនន្តិ មាតាបិតូនន្តិ អត្ថោ. យេ មាតាបិតរោ ជគ្គន្តិ ឧបដ្ឋហន្តិ, តេ តទុបដ្ឋាកា នាម. ភិក្ខុំ ឯវ និស្សាយ ជីវន្តោ ភិក្ខុនិស្សិតកោ នាម. បព្ពជ្ជាបេក្ខោ ‘‘ភណ្ឌូ’’តិ វុច្ចតិ.

២៧៦. អបរេសម្បិ ទសន្នំ កាតុំ វដ្ដតិ, តេ ទស្សេតុំ ‘‘មហាចូឡបិតា’’តិអាទិមាហ. ឯត្ថ (បារា. អដ្ឋ. ២.១៨៥-១៨៧) បន មហាបិតា ចូឡបិតា មហាមាតា ចូឡមាតា មហាភាតា ចូឡភាតា មហាភគិនី ចូឡភគិនីតិ ឥមេហិ អដ្ឋហិ អាទិ-សទ្ទេន បិតុភគិនិញ្ច មាតុភាតិកញ្ច គហេត្វា ទស. ឯតេសំ បន សកេន ភេសជ្ជេន កាតព្ពំ. អត្តនិយេ ច អសតីតិ បាឋសេសោ.

២៧៧. ន កេវលញ្ច ឯតេសំ ទសន្នំ, ឥមេហិ សម្ពន្ធានំ បុត្តនត្តាទីនំ យាវសត្តមា កុលបរិវដ្ដា កាតុំ វដ្ដតីតិ ទស្សនត្ថំ ‘‘កុលទូសនា’’តិអាទិមាហ. អញ្ញោបិ (បារា. អដ្ឋ. ២.២៨៥-២៨៧) យោ អាគន្តុកោ វា ចោរោ វា យុទ្ធបរាជិតោ វា ឥស្សរោ ញាតកេហិ បរិច្ចត្តោ វា គមិយមនុស្សោ វា គិលានោ ហុត្វា វិហារំ បវិសតិ, សព្ពេសម្បិ អបច្ចាសីសន្តេន ភេសជ្ជំ កាតព្ពំ.

២៧៨. មាតា (បារា. អដ្ឋ. ២.១៨៥-១៨៧) បិតា តទុបដ្ឋាកោ ភិក្ខុនិស្សិតកោ បណ្ឌុបលាសោ វេយ្យាវច្ចករោតិ ឥមេសំ ឆន្នំ អនាមដ្ឋបិណ្ឌបាតោ អវារិតោតិ អត្ថោ. កិញ្ច ភិយ្យោ – ទាមរិកចោរស្ស ច ឥស្សរិយស្ស ច ទាតុមវារិតោតិ អត្ថោ.

២៧៩. តេសន្តិ (បារា. អដ្ឋ. ២.១៨៥-១៨៧) គហដ្ឋានំ. សាសនោគធន្តិ រតនបរិត្តអាដានាដិយបរិត្តាទិបរិត្តំ ភណិតព្ពន្តិ អត្ថោ.

២៨០. ‘‘អាគន្ត្វា (បារា. អដ្ឋ. ២.១៨៥-១៨៧) សីលំ ទេតុ, ធម្មញ្ច បរិត្តញ្ច ភាសតូ’’តិ កេនចិ បេសិតោតិ សម្ពន្ធោ. ទាតុំ វត្តុន្តិ សីលំ ទាតុំ, ធម្មញ្ច បរិត្តញ្ច វត្តុំ លព្ភតីតិ អត្ថោ. ភេសជ្ជវិនិច្ឆយោ.

ភេសជ្ជនិទ្ទេសវណ្ណនា និដ្ឋិតា.