៣៣. កាយពន្ធននិទ្ទេសវណ្ណនា

២៣៥. អកាយពន្ធនោតិ កាយពន្ធនំ អពន្ធិត្វាតិ អត្ថោ. តតោ បដ្ឋាយ ចីវរំ បារុបិតព្ពំ, តតោ បដ្ឋាយ ឯវ កាយពន្ធនំ ពន្ធិតព្ពំ. ‘‘ន ភិក្ខវេ អកាយពន្ធនេន គាមោ បវិសិតព្ពោ. យោ បវិសេយ្យ, អាបត្តិ ទុក្កដស្សា’’តិ (ចូឡវ. ២៧៨) ហិ វុត្តំ. តត្ថេវាសតិយា គតោតិ អសតិយា គតោ យត្ថ សរតិ, តត្ថេវ ពន្ធិតព្ពំ. សរិត្វា បន យាវ ន ពន្ធតិ, តាវ បិណ្ឌាយ ចរិតុំ ន វដ្ដតិ. យទិ អន្តោគាមេ សរតិ, កាយពន្ធនេ សតិ ឯកមន្តេ ឋត្វា ពន្ធិតព្ពំ, អសតិ ចេ និក្ខមិត្វា ពន្ធិត្វា បុន បិណ្ឌាយ បវិសិតព្ពន្តិ វទន្តិ.

២៣៦. ‘‘អនុជានាមិ, ភិក្ខវេ, ទ្វេ កាយពន្ធនានិ បដ្ដិកំ សូករន្តក’’ន្តិ (ចូឡវ. ២៧៨) វុត្តត្តា ‘‘ទុវិធ’’ន្តិ វុត្តំ. តត្ថ សូករន្តំ នាម កុញ្ចិកាកោសកា វិយ អន្តេ សុសិរំ កត្វា កោដ្ដិតំ. រជ្ជុ ច ឯកាតិ ឯកវដ្ដា រជ្ជុ ច. តទនុលោមិកាតិ តេសំ ទ្វិន្នំ អនុលោមិកា.

២៣៧. មច្ឆកណ្ឌកខជ្ជុរី-បត្តា មដ្ឋា ច បដ្ដិកាតិ ឯត្ថ (ចូឡវ. អដ្ឋ. ២៧៨) ឯតេ មច្ឆកណ្ដកាទយោ មដ្ឋា វិការរហិតា បដ្ដិកា ច តទន្តោគធាតិ អធិប្បាយោ. លព្ភា ទសា ចតស្សោតិ ឯកាយ វា ទ្វីសុ វា តីសុ វា កថា ឯវ នត្ថីតិ អធិប្បាយោ, តតោ បរំ ន វដ្ដតិ. អន្តេសូតិ ឧភោសុ អន្តេសុ. គុណសុត្តកន្តិ ទិគុណសុត្តកំ.

២៣៩. មករមុខាទិន្តិ អាទិ-សទ្ទេន ទេឌ្ឌុភសីសំ គហិតំ. ឧភន្តេតិ ឧភោសុ អន្តេសុ. កស្សាតិ? វិធស្ស. ឃដកាតិ ឃដកតោ. លេខាតិ លេខាយ. ឃដកតោ ច លេខាយ ច អញ្ញំ ចិត្តកំ ន កប្បតីតិ អត្ថោ.

២៤០. ទេឌ្ឌុភកន្តិ (ចូឡវ. ២៧៨; ចូឡវ. អដ្ឋ. ២៧៨) ឧទកសប្បសិរសទិសំ. មុរជន្តិ ពហុរជ្ជុកេ ឯកតោ សង្កឌ្ឍិត្វា ឯកាយ រជ្ជុយា បលិវេឋេត្វា កតរជ្ជុ. មទ្ទវីណន្តិ បាមង្គសទិសំ. កលាពុកន្តិ អនេកវដ្ដំ. ឯតានិ បន សព្ពានិ ន កប្បន្តិ. ទសាសុ ទ្វេ មជ្ឈិមាតិ មុរជំ មទ្ទវីណន្តិ ទ្វេ មជ្ឈិមា ឯវ. កប្បរេតិ កប្បន្តីតិ អត្ថោ.

២៤១. គណ្ឋិយោ ចាបីតិ (ចូឡវ. ២៧៩) ចីវរគណ្ឋិយោបិ. វេឡុអាទិមយា កប្បន្តីតិ បសង្គេន វុត្តំ. កាយពន្ធនវិនិច្ឆយោ.

កាយពន្ធននិទ្ទេសវណ្ណនា និដ្ឋិតា.

បឋមភាណវារំ.