៣០. វត្តនិទ្ទេសវណ្ណនា

២១៣. ឥទានិ អាគន្តុកវត្តាទីនិ ទស្សេតុំ ‘‘វត្ត’’ន្តិ មាតិកាបទំ ឧទ្ធដំ. បរិក្ខិត្តស្ស (ចូឡវ. ៣៥៦ អាទយោ; ចូឡវ. អដ្ឋ. ៣៥៧ អាទយោ) វិហារស្ស បរិក្ខេបំ, អបរិក្ខិត្តស្ស ទ្វីហិ លេឌ្ឌុបាតេហិ បរិច្ឆិន្នដ្ឋានំ បត្វា ឧបាហនំ ឱមុញ្ចិត្វា នីចំ កត្វា បប្ផោដេត្វា ឧបាហនំ ទណ្ឌកេន គហេត្វា ឆត្តំ អបនាមេត្វា សីសំ វិវរិត្វា សីសេ ចីវរំ ខន្ធេ ករិត្វា សាធុកំ អតរមានេន អារាមោ បវិសិតព្ពោតិ អត្ថោ.

២១៤. បុច្ឆេយ្យ សយនាសនន្តិ ‘‘កតមំ មេ សេនាសនំ បាបុណាតិ, កិំ អជ្ឈាវុត្ថំ វា អនជ្ឈាវុត្ថំ វា’’តិ ឯវំ បុច្ឆិតព្ពន្តិ អត្ថោ.

២១៥-៦. មញ្ចបីឋាទិទារុភណ្ឌញ្ច (ចូឡវ. ៣៦០; ចូឡវ. អដ្ឋ. ៣៦០) រជនភាជនាទិមត្តិកាភណ្ឌញ្ច. អាបុច្ឆាតិ ភិក្ខុស្ស វា សាមណេរស្ស វា អារាមិកស្ស វា ‘‘អាវុសោ ឥមំ ជគ្គាហី’’តិ អារោចេត្វាតិ អត្ថោ. អញ្ញថាតិ ឯវំ អកត្វាតិ អត្ថោ.

២១៧-៨. វុឌ្ឍាគន្តុកស្សាតិ ឯត្ថ (ចូឡវ. ៣៥៨ អាទយោ; ចូឡវ. អដ្ឋ. ៣៥៩ អាទយោ) ទូរតោវ ទិស្វា យទិ ‘‘វុឌ្ឍោ’’តិ ជានាតិ, តស្មិំ អនាគតេ ឯវ អាសនបញ្ញាបនាទិវត្តំ កាតព្ពន្តិ អត្ថោ. បាទោទប្បភុតិន្តិ បាទោទកំ បាទបីឋំ បាទកថលិកំ ឧបនិក្ខិបិតព្ពន្តិ អត្ថោ. បានីយេន អាបុច្ឆន្តេន សចេ សកិំ អានីតំ បានីយំ សព្ពំ បិវតិ, បុនបិ អាបុច្ឆិតព្ពោ ឯវ. បញ្ញបេតិ ‘‘ឯតំ តុម្ហាកំ សេនាសនំ បាបុណាតី’’តិ ឯវំ អាចិក្ខិតព្ពន្តិ អត្ថោ.

២១៩-២០. ‘‘ភិក្ខាចារគាមោ ឥតោ ទូរេ’’តិ វា ‘‘សន្តិកេ’’តិ វា ‘‘កាលស្សេវ បិណ្ឌាយ ចរិតព្ព’’ន្តិ វា ‘‘ឧបដ្ឋាកេ ចរិតព្ព’’ន្តិ វា គោចរោ អាចិក្ខិតព្ពោ. អគោចរោតិ មិច្ឆាទិដ្ឋិកានំ វា គាមោ, បរិច្ឆិន្នភិក្ខកោ វា គាមោ, យត្ថ ឯកស្ស វា ទ្វិន្នំ វា ភិក្ខា ទីយតិ, សោ អាចិក្ខិតព្ពោតិ អត្ថោ. កតិកន្តិ សង្ឃស្ស កតិកដ្ឋានំ. ‘‘ឥមំ កាលំ បវិសិតព្ពំ, ឥមំ កាលំ និក្ខមិតព្ព’’ន្តិ ឯវំ បវេសននិក្ខមនកាលំ អាចិក្ខិតព្ពំ. កេសុចិ ឋានេសុ អមនុស្សា វា វាឡា វា ហោន្តិ, តស្មា ឯវំ អាចិក្ខិតព្ពមេវ. និសិន្នោវាតិ ឥទំ អាបត្តិអភាវមត្តទីបកំ, ឧដ្ឋហិត្វាបិ សព្ពំ កាតុំ វដ្ដតេវ. វត្តវិនិច្ឆយោ.

វត្តនិទ្ទេសវណ្ណនា និដ្ឋិតា.