២៩. មិច្ឆាជីវវិវជ្ជនានិទ្ទេសវណ្ណនា

២០៩. ចុណ្ណន្តិ សិរីសចុណ្ណាទិកន្តិ អត្ថោ. មត្តិកាតិ បកតិមត្តិកា វា បញ្ចវណ្ណា វា សុទ្ធា កុង្កុដ្ឋអាទិកា វា. កុលសង្គហាតិ ឯតេហិ សង្គហិតានំ សន្តិកេ លាភាសាយ កុលសង្គហត្ថន្តិ អត្ថោ. ឯត្ថ បន ឥមេហិ សង្គហិតានំ សន្តិកេ ‘‘កិញ្ចិ លភិស្សាមី’’តិ សង្ឃិកំ វា បុគ្គលិកំ វា ទាតុំ ន វដ្ដតិ ឯវ. ឥមិនា បន នយេន លទ្ធំ បញ្ចន្នម្បិ សហធម្មិកានំ ន វដ្ដតិ, មិច្ឆាជីវញ្ច ហោតិ.

២១០-២១១. លាភាសាយ ទាយកានំ ទារកេ ឧក្ខិបិត្វា បរិភដភាវោ បារិភដកតា, តាយ បារិភដកតាយ ន ជីវយេតិ សម្ពន្ធោ. សេសេសុបិ ឯសេវ នយោ. ខេត្តាទីសុ បេសិតស្ស គមនំ បហេណកម្មំ. សាសនប្បដិសាសនហរណំ ទូតកម្មំ. បេសិតស្ស គេហតោ គេហគមនំ ជង្ឃបេសនិយំ. លាភាសាយ លញ្ជទានមនុប្បទានំ. អញ្ញេន វាបីតិ អង្គវិជ្ជាទិនា.

២១២. វិញ្ញត្តីតិ (បារា. ៥១៥ អាទយោ; បារា. អដ្ឋ. ២.៥១៥ អាទយោ) អញ្ញាតកវិញ្ញត្តិ. អនេសនាតិ បុព្ពេ វុត្តេន បុប្ផទានាទិនា បច្ចយេសនា. កុហនាទីហីតិ (វិភ. ៨៦១; វិភ. អដ្ឋ. ៨៦១; មហានិ. ៨៧) កុហនា លបនា នេមិត្តកតា និប្បេសិកតា លាភេន លាភំ និជិគីសនតាតិ ឥមេហិ បញ្ចហិ វត្ថូហីតិ អត្ថោ. មិច្ឆាជីវវិនិច្ឆយោ.

មិច្ឆាជីវវិវជ្ជនានិទ្ទេសវណ្ណនា និដ្ឋិតា.