២៧. អសំវាសិកនិទ្ទេសវណ្ណនា

១៩៨. ឧក្ខិត្តោតិ អាបត្តិយា អទស្សនេ, អប្បដិកម្មេ, បាបិកាយ ទិដ្ឋិយា អប្បដិនិស្សគ្គេ វា ឧក្ខិត្តកោតិ តិវិធោបិ ឥធ ឧក្ខិត្តោ គហិតោ. អនុបសម្បន្នោតិ ឥមិនា សិក្ខមានសាមណេរសាមណេរីសិក្ខាបច្ចក្ខាតកា គហិតាតិ វេទិតព្ពា. ឆិន្នមូលកោ នាម អន្តិមវត្ថុំ អជ្ឈាបន្នកោ. នានាសំវាសោតិ លទ្ធិនានាសំវាសកោ. ‘‘នានាសីមាយ ឋិតចតុត្ថោ កម្មំ ករេយ្យ, ឥទ្ធិយា វេហាសេ ឋិតចតុត្ថោ កម្មំ ករេយ្យ, អកម្មំ ន ច ករណីយ’’ន្តិ ហិ វុត្តត្តា ឥមេបិ ‘‘អសំវាសិកា’’តិ វុត្តា. ឯតេសុ បន ឧក្ខិត្តកេហិ សទ្ធិំ ឧបោសថាទីនិ ករោន្តោ បាចិត្តិយំ អាបជ្ជតិ. និស្សីមដ្ឋវេហាសដ្ឋេហិ ករោន្តស្ស កម្មំ កុប្បតិ, ទុក្កដញ្ច ហោតិ, ឥតរេហិ ទុក្កដំ. អសំវាសិកវិនិច្ឆយោ.

អសំវាសិកនិទ្ទេសវណ្ណនា និដ្ឋិតា.