២៦. សមានាសនិកនិទ្ទេសវណ្ណនា

១៩៥. តិណ្ណំ វស្សានំ អន្តរំ តិវស្សន្តរំ. ‘‘អនុជានាមិ, ភិក្ខវេ, តិវស្សន្តរេន សហ និសីទិតុ’’ន្តិ (ចូឡវ. ៣២០) ហិ វុត្តំ. យោ ទ្វីហិ វស្សេហិ (ចូឡវ. អដ្ឋ. ៣២០) វុឌ្ឍោ វា នវោ វា, សោ តិវស្សន្តរោ នាម.

១៩៦. មុនីតិ ពុទ្ធមុនិ. សព្ពេហេវាតិ អនុបសម្បន្នេហិបិ.

១៩៧. អន្តន្តិ បច្ឆិមំ. ‘‘អនុជានាមិ, ភិក្ខវេ, យំ តិណ្ណំ បហោតិ, ឯត្តកំ បច្ឆិមំ ទីឃាសន’’ន្តិ (ចូឡវ. ៣២០) វុត្តត្តា យំ តិណ្ណំ បហោតិ, ឯតំ សំហារិមំ វា ហោតុ អសំហារិមំ វា, តថារូបេសុ ផលកខណ្ឌេសុបិ និសីទិតុំ វដ្ដតិ. ទ្វិន្នន្តិ ទ្វិន្នំ សមានាសនិកានំ. ‘‘អនុជានាមិ, ភិក្ខវេ, ទុវគ្គស្ស មញ្ចំ ទុវគ្គស្ស បីឋ’’ន្តិ (ចុឡវ. ៣២០) វុត្តត្តា ទ្វេ សមានាសនិកា សហ និសីទិតុំ លភន្តិ. អញ្ញេហិ អសមានាសនិកេហិ, អនុបសម្បន្នាទីហិ វា ទ្វេ ហុត្វាបិ និសីទិតុំ ន លភន្តិ. សមានាសនិកវិនិច្ឆយោ.

សមានាសនិកនិទ្ទេសវណ្ណនា និដ្ឋិតា.